Atrebates

Les Atrebates (çou ki vout dire colons) estént ene tribu gålwesse; i viként e l' Atrebateye, k' esteut a pô près so çou ki dvénrè pus tård l' Artois. Leu mwaisse veye, Nemetocenna, divénrè Atraik ([FR] Arras).

Å cmince des gueres gueres del Gåle, Commius, li tchîf des Atrebates, s' aloya-st avou Djule Cezår; mins pus tård, i s' meta-st avou Vercingetorix et s' bate siconte des Romins. Il ont pårticipé å sidje d' Alesia. Pus tård, on côp batous, il a bagué avou ene pårteye di s' peupe viè les iyes britanikes, dins l' boket nonnrece di çou ki dvénrè l' Inglutere, wice k' il ont basti leu novele mwaisse veye Calleva Atrebatum (Silchester).

Les dschindants da Commius vont esse les moenneus di leu novea payis disk' a tant ki Claudius finirè pa concweri eyet mete li Britannia dizo l' mambornance rominne. Li payis des Atrebates divénrè li royåme romin-amishtåve des Regnenses.

• Commius, li Gålwès, i fourit roy disk' a -35 a pô près. On ndè cåze dins li Stratagemata da Frontinus
• Commius li djonne, li valet do prumî, fourit roy di -35 a -20 a pô près.
• Tincommius, fi da Commius li djonne, i fourit roy -20 a 7 di noste ere, cwand i fourit displaecî pa s' fré. Sacwants tecses mencionèt si voyaedje a Rome po cåzer di s' cas a l' Impreur Ågusse.
• Eppillius, li fi da Commius li djonne, fourit roy di 7 a 10 di noste ere; i fourit eto displaecî pa on fré da lu. Après cwè i s' ebaga eyet divni roy des Cantiaci.
• Verica, fi da Commius li djonne, roy di 10 disk' a motoit 42 di noste ere, cwand les Atrebates ont stî concwerous påzès Catuvellauni. Verica dimanda l' aidance di Rome, çou ki dna a l' impreur Claudius l' escuze po-z evayi l' Grande Burtaegne.