Ted Hankey

Ted Hankey (Stoke-on-Trent, 20 februoari 1968) is en Iengelschn veugelpieker die ol twi keirs weireldkampioen ewist is byn de BDO (British Darts Organisation). Zyn bynoame is The Count (enoemnd no Count Dracula).

Olhoewel da Hankey mêer of 10 aar toernôoin ewonn het, is 'n surtout ekend deur dat 'n twi kirs 't weireldkampioenschap van de BDO, in de Lakeside Country Club in Frimley Green, ewonn het.

E dei 'n êeste kêe mei in 1998 en rochte van 'n êeste kêe in de kwartfinalles, woa dat 'n verlôor teegn Colin Monk (die zevve in d'hove finalles verlôor van Raymond Van Barneveld, die 't toernôi loater oek gienk winn). 't Joar derup kwam 'n zyn Woaterlôo ol teegn in de twidde rounde, mor in 2000 wos 't wel prys, e wonne van Ronnie Baxter in de finalle, me 6-0. E smêet toune oek uut met de hogste score meugelik, 170 (2 kirs triple 20 en e rôze). 't Joar derup rocht 'n were in de finalle, achter dat 'n oundermêer Van Barneveld en Andy Fordham eklopt had, mor in de finalle wos John Boy Walton te straf me 6-2.

In de zeevn joar derachter rocht 'n nog 4 keirs in de kwartfinalles, êne kir in de twidde rounde en ne vlôog 'n er oek twi kirs uut in d'êeste rounde. Achter zyn verlies in de kwartfinalles van 2008 (met 5-0 teegn 'n Australiër Simon Whitlock) wuldeg 'n uutschêen omdat 'n nie mi kuste 't akkôord zyn me ze slicht smytn. Achter en ende van bezinnieng, woarin dat 'n wrochte an zyn techniek, erbegust 'n te speeln, mo nie ol te goed. E beguste oek mêer te drienkn, tout an der êentige van zyn veugelpiekmoatn (oundermêer Tony O'Shea en Gary Anderson) zein dat 'n nem moeste erpakkn.

In 2009 dei 't 'n dadde oek up 't weireldkampioenschap. Hankey klopte up weug no de finalle oundermêer oud-weireldkampioenn John Walton en Martin Adams en in de finalle kwam 'n ol zêre vôorn en 'n hield dien vôorsproung hêel 'n match, toet a 't 6-4 wos en 'n êentige kirs kuste smytn voun uut. E miste oundermêer e geweune twove en mêerdere dubbel tops, woadeure dat O'Shea kuste werekêern toet 6-6. Uuteindelik won Hankey egliek deur 'n latstn set met 3-1 te winn. Hankey had tope met Martin Adams oek d'ogste uutsmete (161) en 't mêeste 180's (42).

Hankey's bynoame is The Count, no Dracula, woa dat 'n styf in interesseerd is. E komt oek up 't podium met e cape an en ne smyt vleermuuzn in 't publiek.

• 1998: kwartfinalle: 2-5 verlôorn teegn Colin Monk
• 1999: twidde rounde: 1-3 verlôorn teegn Chris Mason
• 2000: finalle: 6-0 ewonn teegn Ronnie Baxter
• 2001: finalle: 2-6 verlôorn teegn John Walton
• 2002: twidde rounde: 2-3 verlôorn teegn Wayne Jones
• 2003: êeste rounde: 2-3 verlôorn teegn Tony O'Shea
• 2004: kwartfinalle: 1-5 verlôorn teegn Tony O'Shea
• 2005: kwartfinalle: 3-5 verlôorn teegn Martin Adams
• 2006: êeste rounde: 1-3 verlôorn teegn Albertino Essers
• 2007: kwartfinalle: 3-5 verlôorn teegn Martin Adams
• 2008: kwartinalles: 0-5 verlôorn teegn Simon Whitlock
• 2009: finalle: 7-6 ewonn teegn Tony O'Shea
• 2010: kwartfinalle: 4-5 verlôorn teegn Dave Chisnall
• 2011: êeste rounde: 0-3 verlôorn teegn Scott Waites

• Dutch Open (2)
• England Open (3)
• German Open (2)
• Malta Open (2)
• Belgium Open
• Norway Open
• Denmark Open
• Embassy Gold Cup
• Primus Gold Cup