Philippe IV van Vrankryk

Philippe IV

1268-1314
Keunienk van Vrankryk
Periode 1285-1314 Vôorganger Philippe III Ipvolger Louis X
Keunienk van Navarra
Periode 1284-1305 tegoare me Joanna I Vôorganger Joanna I Ipvolger Louis X/I
Voader Philippe III Moeder Isabel van Aragón

Philippe IV, bygenoamd de Schôonn (Frãns: le Bel), van 't Huus Capet, (Fontainebleau, 1268 - Fontainebleau, 29 november 1314), was e zeune van keunienk Philippe III van Vrankryk en zyn êeste vrouwe Isabel van Aragón.

Je was keunienk van Vrankryk van 1285 tout 1314. En deur zyn huwelik me Joanna I van Navarra wast ie ook keunienk van Navarra en groaf van Champagne.

Philippe IV trouwde in 1284 me Joanna. Z'haan zeevn jounges, woavan drie ipêenvolgnde Frãnsche keuniengn.

1. Marguerite (ca. 1288-1294)
2. Louis X (1289-1316), keunienk van Vrankryk van 1314 tout 1316.
3. Blanche (1290-1294)
4. Isabelle (1292-1358), getrouwd met Edward II van Iengeland van 't Huus Plantagenet. Heur zeune Edward III begost den Hounderdjoarign Oorloge over zyn ansproake ip de Frãnsche trôone achter 'n dôod van Charles IV. Mo Philippe van Valois wierd verkoozn en je kwam als Philippe VI den êeste keunienk van 't Huus Valois.
5. Philippe V (1293-1322), keunienk van Vrankryk van de 1316 tout 1322.
6. Charles IV (1294-1328), keunienk van Vrankryk van 1322 tout 1328.
7. Robert (1296-1308)

Vloandern kwam achter et Verdrag van Verdun in 843 een stik van Vrankryk, mo 't blêef wel zo goed als ounofhankelik van de Frãnsche krôone.

Philippe IV wilde da verandern en 't gezag van zyn keuniengshuus versterkn deur et Groafschap Vloandern by zyn krôondomein te voegn. Je gerakte doadeure in conflict me de Vlamsche groaf Gwyde van Dampierre, die ook al miserie haad me de Vlamsche steedn die ryke gekommn woarn deur de loaknindustrie, en assan mo mêer ottonomie ipeistn. Vloandern haad ton de rykste steedn van dien tyd, lik Brugge, Yper, Gent, Doornik, Rysel, Sint-Omoars en Dowoai.

Der kwoamn in dien tyd ook mêer en mêer spanniengn tusschn de ryke patriciërs (de lelioarts) en d'ambachtn die verêenigd woarn in gildn (de klauwoarts). D'ambachtsgildn trokkn partye vo Gwyde en de Frãnsche krêegn de steun van 't stedelik patricioat.

De Vlamsche steedn woarn ofhankelik van Iengeland vo d'anvoer van under wulle, en ze voundn da de Frãnsche keunienk hem nie moste moein met under zoakn.

Vrankryk was al van in 1294 in oorloge met Iengeland. Gwyde trok partye vor Iengeland en je steunde keunienk Edward I. J'arrangeerde de verloovienge tusschn zyn dochter Filippine me den Iengelschn trôonipvolger, de loatern Edward II.

Vanof 1296 wast 'n in oopnlikke vyandschap me zyn lêenheere. Philippe IV reageerde deur e leger no Vloandern te zendn. De 20stn ogustus wierd er in Bulskamp by Veurne slag geleverd, en hêel 't westelik stik van Vloandern wierd bezet deur de Frãnsche.

In 1300 wierdn Gwyde en zyn twi oudste zeuns gevangn gezet, Gwyde in 't kastêel van Compiègne, Robrecht van Béthune in Chinon en Willem van Crèvecoeur in Issoudun. Zyn dochter Filippine wierd an heur 19 joar gevangn gezet in 't gevang van Blois vor heur trouw te belettn. Z'hen heur doa verzekers vergiftigd en ze stierf in 1306.

Vloandern wierd g'annexeerd en miek nu dêel uut van 't Frãns krôondomein. Philippe IV benoemde Jacques de Châtillon tout landvoogd en je liet al de lêeuwn ip de voandels en woapnschildn vervangn deur lelies.

In 1301 kwoamn de wevers met under leider Pieter de Coninck in ipstand teegn 't Frãnsgezind patricioat. Ze woarn kwoad omdan ze zo vele belastiengn mostn betoaln vo 't bezoek van de keunienk te bekostign.

In de moand meie van da joar kwam Philippe IV zyn nieuwe gebiedn bezoekn me zyn vrouwe Joanna van Navarra.

Vor under bezoek in Brugge haan de patriciërs zo vele geld uut gegeevn en woarn under vrouwn zo ryke geklid da Joanna zei: Ik peisdn da 'k ik hier d'ênigste keuniginne woarn.

Pieter de Coninck kost de klauwoarts ipmoakn vor under mêester te moakn van 't stadsbesteur. Mo Jacques de Châtillon krêeg hulpe van zyn broere, de groaf van Saint-Pol, en algouwe kostn ze met e leger den ipstand ounderdrukkn.

In meie 1302 wierd er gereageerd mè de Brugse Mettn, en den 11ste juli 1302 versloegn ze 't Frãns leger by Kortryk in de Guldnspoornslag.

Ofbeeldiengn die ier by passn ku je vien in de categorie Philip IV of France van Wikimedia Commons.