Čudovo

Čudovo
Чудово

Lidnanznam
Valdkund	Venäma
Eläjiden lugu (2020)	13,909 ristitud
Pind	14 km²
Pämez'	Oleg Gaspadarik (reduku 2015—)
Telefonkod	+7−81 665-xx-xxx
Avtokod	53
Aigvö	UTC+3 (MSK+0)

Čudovo (ven.: Чу́дово) om Venäman lidn da lidnankund Uz'lidnan agjan pohjoižes. Se om Čudovon rajonan administrativine keskuz.

Čudovo-eländpunktad mainitasoiš ezmäižen kerdan Uz'lidnan Vodin pätinan aigkirjas vl 1539 kuti Čudovo Kerestil- (ven.: Чудово на Керести) i Čudovskai Luk- (ven.: Чудовская Лука) küläd. Kätihe Jam-Čudovo:ks «Piter — Moskv»-počtraktal, se läbiti Uz'lidnad. Vll 1849−1851 saudihe «Moskv — Piter»-raudted, i Čudovo šingotaškanzihe raudtežiloks. Vl 1871 raudte ühtenzoiti sidä Uz'lidnanke. Vl 1923 kätihe lidnanvuiččeks žiloks, vn 1937 20. päiväl kezakud anttihe lidnan statusad.

Suren sodan aigan lidn oli okkupiruidud nacistižen Germanijan sodavägil (20. eloku 1941 — 29. viluku 1944).

Čudovo šingotase energetižen mašinansauvomižen tegimel^[1], sauvondmaterialiden tegimil (faner, špon, mineraline lämuzizoläcii, raudtebetonšpalad, metallkonstrukcijad), järedal konditerfabrikal i virifabrikal, mugažo cementan tegim om sauvomas.

Lidn sijadase Kerest'-jogen hural randal tobjimalaz (Olhavan hura ližajogi), 34 m ü.m.t. keskmäižel korktusel, «Moskv — Piter»- i «Sur' Uz'lidn — Volhov»-raudtekeskustoil. Matkad Leningradan agjahasai om 12 km lodeheze, Surhe Uz'lidnhasai om 70 km suvhe kaikil teil, Piterihesai om 118 km lodeheze, Moskvhasai — 532 km suvipäivnouzmha. Lähembaižed lidnad oma Leningradan agjan Lüban' 30 km lodeheze avtotedme vai raudtedme i Kiriši 42 km pohjoižpäivnouzmha orhal, raudtel vai 57 km avtol.

Lidn om lidnankundan üks'jäižeks eländpunktaks.

Vn 2010 Venäman rahvahanlugemižen mödhe lidnan eläjiden lugu oli 15 397 ristitud, rajonan seičeme kümnendest. Kaik 14 730 eläjad oli lidnas vl 2017. Kaikiš suremb lidnan ristitišt oli 17..18 tuh. eläjid vll 1989−2005 (18 100 rist. vll 1992−1996).

Rahvahad (enamba 0,4 % vl 2021): venälaižed — 68,8 %, čiganalaižed — 7,5 %, ukrainalaižed — 0,5 %, toižed rahvahad — 3,1 %, rahvahuden ozutandata — 20,1 %.

Ortodoksižen hristanuskondan Jumalanmaman Kazanin jumalaižen jumalanpert'^[2] om avaitud, letihe vll 1904−1906.

Čudovon tehnikum^[3] om lidnan professionaližen opendusen aluzkundaks.

• 
  Lidnan i rajonan Administracijan sauvuz (2021)
• 
  Jumalanmaman Kazanin jumalaižen pühäpert', vn 2022 nägu
• 
  «Cadbury»-kompanijan konditerine fabrik vl 2005
• 
  Nikolai Nekrasov-runokirjutajan muzei (2010, radab vspäi 1971)
• 
  Čudovo-Moskovskoje-päraudtestancii vl 2010

1. ↑ Energetižen mašinansauvomižen «Energomaš»-tegimen sait (energomach.com). (ven.)
2. ↑ Čudovon pühäpertid sobory.ru-saital. (ven.)
3. ↑ Čudovon tehnikuman sait (npopu2.ru). (ven.)

• Čudovon lidnankundan da rajonan tobmuden aluzkundoiden sait (admchudovo.gosuslugi.ru). (ven.)
• Čudovon kodirandantedištandmuzejan sait (km-chudovo.kulturu.ru). (ven.)

Čudovo Vikiaitas