Zelenokumsk

Zelenokumsk
Зеленокумск

Lidnanznam	Flag
Valdkund	Venäma
Eläjiden lugu (2023)	32,972 ristitud
Pind	24 km²
Telefonkod	+7−86 552-xx-xxx
Avtokod	26, 126
Aigvö	UTC+3 (MSK+0)

Zelenokumsk (ven.: Зеленоку́мск) om Venäman lidn Stavropolin randan suves. Se om Nevondkundaližen lidnümbrikon administrativine keskuz da pala.

Eländpunktan aluz om pandud vl 1781 kuti saldatoiden erindas žilo. Vl 1783 Jekaterina II-imperatornaine lahjoiči mad senno Voroncov-grafale, i Voroncovo-Aleksandrovskoje-žilo sauvoškanzihe. Vl 1963 ühtištadihe sidä olnu Kuman hural randal Novogrigor'jevskoje-žilonke, nimitihe Nevondkundaline-žiloks (ven.: село Советское). Se sai lidnan statusad vn 1965 9. päiväl redukud nügüdläiženke nimenke.

Zelenokumsk šingotase sauvondmaterialiden pästandal (torved, silikatine savič) i betonmašiništon tehmižel, sömtegimišton edheotandoil (oludentegim, villänpurnud, Budönnovskan maidtegimen ceh), mugažo poukahtuzvastaižiden elektroladimiden tegim^[1] radab (pidatimed, katkaižimed, LED-lentad).

Lidn sijadase Kumanjogen molembil randoil (Kaspijan meren bassein), 145 m keskmäižel korktusel valdmeren pindan päl.

Matkad Stavropolihesai om 165 km lodeheze orhal vai 235 km avtotedme. Lähembaižed lidnad oma Georgijevsk 43 km suvipäivlaskmha orhal vai 53 km avtotedme i Budönnovsk 47 km pohjoižpäivnouzmha orhal vai 57 km raudtedme i avtol.

Zelenokumskan lidnankund oli vll 2004−2017. Kaik kuz' futorad 100..500 eläjad ristitištonke mülüiba lidnankundha lidnan ližaks, ned alištuiba lidnan nevondkundale nevondkundaližen-ki aigan.

Vn 2010 Venäman rahvahanlugemižen mödhe lidnan eläjiden lugu oli 35 839 ristitud, vn 2021 — 33 187 ristitud, ümbrikon koume videndest. Vl 2017 lidnan ristitišt oli 35 646 eläjad, lidnankundan 37 186 eläjad. Kaikiš suremb lidnan ristitišt oli 39..40 tuhad eläjid vll 1998−2009 (40 500 rist. vl 2008).

Rahvahad (enamba 1 % vl 2010): venälaižed — 85,8 %, armenijalaižed — 2,5 %, čiganalaižed — 2,0 %, tabasaranalaižed — 1,3 %, ukrainalaižed — 1,2 %, toižed rahvahad — 5,6 %, rahvahuden ozutandata — 1,6 %.

Ortodoksižen hristanuskondan seičeme pühäpertid^[2] oma saudud da avaitud lidnas: nell' jumalanpertid i koume časounäd. Niiden ližaks vanhuskolaižiden Kazanin Jumalanmaman jumalanpert' ei ole kaičenus (oli vspäi 1912). Protestantizman kaks' loičendpertid oma avaitud: seičemenden päivän adventistoiden i baptistoiden.

Zelenokumskan äiprofil'ne tehnikum^[3] om lidnan professionaližen opendusen aluzkundaks.

• 
  Kuvapatsaz puištos (2016)
• 
  Te lidnan puištos, vn 2016 nägu
• 
  Suren sodan vägimehiden mušton allei lidnan puištos vl 2016
• 
  Enzne nevondkundaline lidnanznam (oli vspäi 1975)

1. ↑ «Velan»-tegimen sait (velan.ru). (ven.)
2. ↑ Zelenokumskan pühäpertid sobory.ru-saital. (ven.)
3. ↑ Zelenokumskan äiprofil'žen tehnikuman sait (zmt1.ru). (ven.)

• Nevondkundaližen lidnümbrikon tobmuden aluzkundoiden oficialine sait (sgosk.ru). (ven.)

Zelenokumsk Vikiaitas