Zverevo

Zverevo
Зверево

Lidnanznam	Flag
Valdkund	Venäma
Eläjiden lugu (2020)	18,068 ristitud
Pind	31,21 km²
Pämez'	Svetlana Bušlanova (kezaku 2011—, Светлана Бушланова)
Telefonkod	+7−86 355-xx-xxx
Avtokod	61, 161
Aigvö	UTC+3 (MSK+0)

Zverevo (ven.: Зве́рево) om Venäman lidn da lidnümbrik Rostovan agjan päivlaskmas.

Eländpunktan aluz om pandud vl 1819 kuti Zverevo-futor, nimitihe sen man pidajiden Zverevad-velliden kanzannimen mödhe. Zverevo-raudtestancii radab «Rostov Donal — Moskv»-keskustal vspäi 1871. Kätihe radnikžiloks vl 1929. Se oli Zverevon rajonan (1934−1963) keskuseks vhesai 1943, sid' Lihovskoi-žilo (nüg. Kamenskan Šahtil pala). Zverevo oli okkupiruidud nacistoil (heinku 1942 — 13.02.1943) Toižen mail'man sodan aigan. Radnikžilo sai lidnan statusad vl 1989.

Zverevo šingotase polimeriden tehmižel, elevatoral i kivihilen samižel («Obuhovskai»-kaivuzohjandaikund).

Lidn sijadase 240 m ü.m.t. keskmäižel korktusel, ei ole londuseližid vezištoid. Om ümbärtud Rusttan Sulinan rajonan territorijal. Matkad Rostovhasai Donal om 94 km suvhe orhal, 110 km avtotel vai 141 km raudtel. Lähembaižed lidnad oma Gukovo vides kilometras päivlaskmha orhal, avtotedme vai raudtedme, Rusked Sulin 15 km suvhe orhal, 35 km avtotedme vai 20 km raudtedme, i Kamensk Šahtil 30 km pohjoižhe orhal, 35 km avtotedme vai raudtedme. Avtote ühtenzoitab «Don»-trassanke (M4) viž kilometrad päivnouzmha i Ukrainan röunanke päivlaskmha Gukovon kal't. Zverevo-passažirstancii radab lidnas da kaks' jügustancijad: Zverevskai i Novomihailovskai.

Trudovoi-futor (1 670 rist. vl 2017) mülüb lidnümbrikho Zverevon ližaks. Lidnümbrikon pind — 32,2 km².

Vl 1939 žilon ristitišt oli 7 500 eläjad. Vn 2010 Venäman rahvahanlugemižen mödhe eläjiden lugu oli 22 411 ristitud, lidnümbrikon — 24 119 ristitud. Kaikiš suremb lidnan ristitišt oli 32 800 eläjad vll 1996. Kaik 19 456 ristitud elihe lidnas i 21 126 ristitud kaikes lidnümbrikos vl 2017.

Rahvahad (2010): venälaižed — 92,6 %, ukrainalaižed — 2,2 %, armenijalaižed — 1,4 %, toižed rahvahad — 3,8 %.

Ortodoksižen hristanuskondan koume pühäpertid^[1] oma saudud lidnas: ph. Mikulai-čudonsädajan jumalanpert' (om letud vodele 1996 vanhas eländpertišpäi) i kaks' časounäd.

Zverevon torguindtegimištoline tehnikum^[2] (profškol nomer 64 edel vn 2019 sügüz'kud) om lidnan professionaližen opendusen aluzkundaks.

Lidnümbrikon pämez' om Lidnan Duman ezimez' vn 2018 vilukuspäi. Lidnan Administracijan pämez' om Aleksandr Lotarev vn 2021 sulakuspäi. Edeline lidnan pämez' om Mihail Solonicin (uhoku 2018 — tal'vku 2020).

• 
  «Obuhovskai»-kaivusen edheotandan nägu vl 2012
• 
  Gimnazii A.P. Čehovan nimed (2020)
• 
  Zverevo-päraudtestancijan sauvuz vl 2018 (kivine vspäi 1894)

1. ↑ Zverevon pühäpertid sobory.ru-saital. (ven.)
2. ↑ Zverevon torguindtegimištoližen tehnikuman nügüdläine sait (tpt-zverevo.ru) (ven.) i sen vanh sait (pu-64.ucoz.ru). (ven.)

• Lidnan tobmuden aluzkundoiden sait (zverevo.donland.ru) (ven.)

Zverevo Vikiaitas