Spas-Klepiki

Spas-Klepiki
Спас-Клепики

Lidnanznam	Flag
Valdkund	Venäma
Eläjiden lugu (2019-01-01)	5,243 ristitud
Pind	6 km²
Pämez'	Galina Ciganova (reduku 2016—)
Telefonkod	+7−49 142-xx-xxx
Avtokod	62
Aigvö	UTC+3 (MSK+0)

Spas-Klepiki (ven.: Спас-Кле́пики, pagin. lühenduz Клепики) om Venäman lidn da lidnankund Räzanin agjan pohjoižes. Se om Klepikin rajonan administrativine keskuz.

Eländpunkt om olmas 16. voz'sadaspäi, mainitase ezmäižen kerdan vl 1619 kuti Klepikovo-žilo. Nimituz libub kalan puhtastandan veičen venäkel'žes клепик-nimespäi. Šingotihe kangazfabrikal 18. voz'sadaspäi. Sai tošt Spasskoje-nimitust Spasan Toižetamižen jumalanpertin sauvondan jäl'ghe vl 1859 (paloi vl 2017). Nügüdläine nimituz om olmas 20. voz'sadan augotišespäi. Torgovanoiden pertišt om kaičenus hüvin.

Anttihe makundan lidnan statusad vl 1920. Kaidraižuine raudte («Meščoran magistral'») ühtenzoiti Räzaninke i Vladimiranke vll 1901−2011, rušihe ten palad läz lidnad vl 1999, se i stancijan sauvuz eile rados. Lidnan administracii om likvidiruidud vn 2012 sulakus, rajonan administracii tegeb sen velgusidme.

Spas-Klepiki šingotase tekstil'tegimištol (trikotažfabrik, omblendfabrik, vatanfabrik), kengiden edheotandal, santehnikan šlangiden tehmižel, Räzanin «Täžpressmaš»-tegimen filial.

Lidn sijadase rajonan päivlaskmas, Pranjogen hural randal (ven.: Пра 167 km pitte, Okan hura ližajogi), 110 m ü.m.t. keskmäižel korktusel. Sovk-jogi (ven. Совка 23 km pitte) om lidnan päivlaskmaižeks röunaks i lankteb Praha Klepikin suves. Rahvahaližen puišton londuseližiden järviden čep' zavodiše 3 km pohjoižhe lidnaspäi. Matkad Moskvan agjhasai om 15 km lodeheze orhal, Vladimiran agjhasai — 22 km pohjoižpäivnouzmha orhal. Matkad Räzanihesai om 62 km suvipäivlaskmha orhal vai 75 km avtotel. Lähembaine lidn om Kurlovo (raudtestancii, Vladimiran agj) 45 km pohjoižpäivnouzmha orhal vai 67 km avtotedme.

Kahesa küläd mülüdas lidnankundha Spas-Klepikin ližaks. Lidnankundan pind — 7,64 km².

Vl 1897 lidnan ristitišt oli 1 327 eläjad, vl 1939 — 3 657 eläjad. Vn 2010 Venäman rahvahanlugemižen mödhe lidnan eläjiden lugu oli 5 916 ristitud, lidnankundan — 6 394 ristitud, rajonan nelländez. Kaikiš suremb lidnan ristitišt oli enamba seičemed tuhad eläjid vll 1979−1998 (7 209 rist. vl 1989). Kaik 5 874 ristitud elihe lidnankundas vl 2017.

Rahvahad (2010): venälaižed — 96,8%, toižed rahvahad — 3,2%.

Ortodoksižen hristanuskondan kaks' jumalanpertid^[1] oma olmas lidnas.

Klepikin tehnologine tehnikum^[2] om lidnan professionaližen opendusen aluzkundaks.

• 
  Lidnan da rajonan administracijan pert' (2010)
• 
  Ph. Mikulai-čudonsädajan jumalanpert'
  (om saudud vll 1838−1842,
  vn 2015 nägu)
• 
  Rahvahaližen «Meščorskii»-puišton znam
• 
  Vägimehiden allei
• 
  Endevanh arhitektur

1. ↑ Spas-Klepikin pühäpertid sobory.ru-saital. (ven.)
2. ↑ Klepikin tehnologižen tehnikuman sait (kttsk.ru). (ven.)

• Lidnan da rajonan tobmuden aluzkundoiden sait (klepikovskiy.ryazangov.ru). (ven.)
• Lidnan i rajonan informacine sait (klepiki.ru). (ven.)

Spas-Klepiki Vikiaitas