Snežinsk

Snežinsk
Снежинск

Lidnanznam	Flag
Valdkund	Venäma
Eläjiden lugu (2021)	51,751 ristitud
Pind	35 km²
Pämez'	Igor' Saprikin (tal'vku 2015—)
Telefonkod	+7−35 146-xx-xxx
Avtokod	74, 174
Aigvö	UTC+5 (MSK+2)

Snežinsk (ven.: Сне́жинск, mugažo totaran i baškiran kelil) om Venäman sauptud lidn Čeläbinskan agjan pohjoižes. Se om Snežinskan lidnümbrikon administrativine keskuz.

Eländpunktan aluz om pandud vl 1955 kuti Eländžilo nomer 2 (ven.: Жилой посёлок № 2) tedoidamha da sädamha südäitukuižšlibakoid. Se sai lidnan statusad vn 1957 23. päiväl semendkud Kasli-2-nimitusenke. Nimitihe lidnad Čeläbinsk-50 vll 1959−1966, Čeläbinsk-70 vll 1966−1993. Vspäi 1993 lidn om olmas nügüdläiženke nimenke oficialižikš. Sen perimetr kaičese seičemel ambundpalakundal.

Snežinsk šingotase Venäman südäitukuižkeskusel — tehnižen fizikan tedoinstitutal (läz 9 tuhad radnikoid), elektroladimiden tegimel, sauvondmaterialiden pästandal (keramine ozrikkivi, betonantegim), maižandusen abuedheotandal.

Lidn sijadase ümbrikon pohjoižpalas, Keskuralan päivnouzmaižel ezimägištol, 270 m ü.m.t. keskmäižel korktusel. Sinar-järv (ven.: Синара, 24 km²) om lidnan pohjoižrandaks, Silač-järv — suvirandaks (bašk.: Илашты, 18 km²). Matkad Sverdlovskan agjahasai om 17 km pohjoižhe orhal, Čeläbinskhasai om 111 km suvipäivnouzmha-suvhe orhal vai 128 km avtotel. Lähembaine lidn om Kasli 22 km suvhe orhal vai 27 km avtotedme.

Lidn ühtenzoitase kümnekilometrižel sarakol «Jekaterinburg — Čeläbinsk»-avtotenke. Avtonomine raudte radab Snežinskas tegimišton täht.

Lähine Randžilo (ven.: Ближний Береговой, 275 rist. vl 2010) i Klüči-külä (101 rist. vl 2010) mülüdas lidnümbrikho Snežinskan ližaks. Lidnümbrikon pind — 357,36 km².

Vn 2010 Venäman rahvahanlugemižen mödhe lidnan eläjiden lugu oli 48 810 ristitud, lidnümbrikon — 49 186 ristitud. Vspäi 1996 lidnan ristitišt vajehtase 48..50 tuhad eläjad röunoiš (50 500 rist. vll 2003−2005, 50 759 rist. vl 2017), kaikiš suremb ristitišt om nügüd'. Kaik 51 113 eläjad oli lidnümbrikos vl 2017.

Rahvahad (2010): venälaižed — 90,4%, totarlaižed — 3,6%, baškiralaižed — 2,9%, ukrainalaižed — 1,6%, toižed rahvahad — 1,5%.

Professionaližen opendusen aluzkundad oma: keskopendusen — Ozörskan tehnižen kolledžan Snežinskan filial^[1], üläopendusen om Snežinskan fiziž-tehnine institut — Nacionaližen MIFI-südäitukuižtedoiduzkeskusen filial (MIFI-6).

• 
  Lidnümbrikon administracijan sauvuz Leninan torgul (2014)
• 
  Jumalanmaman «Deržavnai»-jumalaižen časoun', vn 2014 nägu
• 
  Venäman südäitukuižkeskuz — tehnižen fizikan tedoinstitut vl 2017 (ohjastusen sauvuz)
• 
  Lapsiden muzikškol (2017)
• 
  Snežinskan fiziž-tehnine institut (vl 2009 akademii oli)

1. ↑ Ozörskan tehnižen kolledžan Snežinskan filialan sait (spt.snzsite.ru). (ven.)

• Lidnümbrikon oficialine sait (snzadm.ru). (ven.) (+ äikel'ne avtomatine känduz)
• Lidnümbrikon Ezitajiden Nevondkundan sait (sd.snzadm.ru). (ven.)

Snežinsk Vikiaitas