Sanj (lidn)

Sanj
三亞 / 三亚 (Sānjà)

Valdkund	Kitai
Eläjiden lugu (2020)	1,038,300 ristitud
Pind	1,919,58 km²
Pämez'	Čžou Hunbo (viluku 2021—, 周红波)
Telefonkod	+86-(0)898
Aigvö	UTC+8

Sanj (kit.: 三亞, kebnetud kit. 三亚, pin'jin': Sānyà) om lidn-kurort Kitain suves, Hainan'-agjan da saren suves, Kitain Suvimeren randal. Nece om valdkundan kaikiš suvemb lidn i lidnümbrik.

Eländpunkt sai lidnan oficiališt statusad vl 1984, sätihe lidnümbrikod vl 1987. Vspäi 2014 lidnümbrik jagase nelläks rajonaks.

Sanj šingotase rahvahidenkeskeižen turizman erazvuiččiden sarakoiden keskuseks i Man kaimdajiden sädandal civiližiden tarbhaižusiden täht. Meriveden lämuz vajehtase +22..+28 C° röunoiš vodes läbi. Lidnan tahond om tetab čajun sortuiden kazvatandal.

Lidn sijadase ühtennimižen merilahten randal, mägiden i meren keskes.

Klimat om tropine kaks'sezonine. Voden keskmäine lämuz om +25,8 C°, +23..+28 C° kuidme. Ekstremumad oma +5 C° i +35 C°. Paneb sadegid 1453 mm vodes, enamba heinkus-redukus (212..268 mm kus), kuiv sezon oleskeleb tal'vkus-keväz'kus (6..21 mm kus).

Vn 2010 Kitain rahvahanlugemižen mödhe lidnümbrikon eläjiden lugu oli 685 408 ristitud. Kaikiš suremb ristitišt om nügüd'. Lidnan ristitišt om 550 tuhad eläjid (2018) 153 km² pindal.

Kaks' üläopendusen aluzkundad baziruišoiš lidnas: privatine Sanjan universitet^[1] (kit.: 三亚学院 Sānyà xuéyuàn, alusenpanend 2005, 20 tuh. üläopenikoid vl 2018) i valdkundaline Hainanin tropižen okeanografijan universitet^[2] (kit.: 海南热带海洋学院 Hǎinán rèdài hǎiyáng xuéyuàn, alusenpanend 1977, vll 1993−2015 Cünčžoun universitet i kolledž, 10 tuh. üläopenikoid vl 2011).

Edeline lidnümbrikon pämez' (partijan lidnankomitetan sekretar') om Tong Daoči (kül'mku 2018 — kül'mku 2020, 童道驰). Lidnan mer om Čen Si (陈希) vn 2022 semendkuspäi.

1. ↑ Sanjan universitetan sait (sanyau.edu.cn). (kit.)
2. ↑ Hainanin tropižen okeanografijan universitetan sait (hntou.edu.cn). (kit.)

• Lidnan tobmuden sait (sanya.gov.cn). (kit.)

Sanj (lidn) Vikiaitas