Koltuši

Koltuši
Колтуши

Valdkund	Venäma
Eläjiden lugu (2021)	13,836 ristitud
Pind	5 km²
Telefonkod	+7−81 370-xx-xxx
Avtokod	47
Aigvö	UTC+3 (MSK+0)

Koltuši (ven.: Ко́лтуши, suom.: Keltto) om lidn Leningradan agjan Vsevoložskan rajonan suves. Se om Piterin päivnouzmaine ezilidn, Koltušin lidnankundan administrativižeks keskuseks.

Koltuši-külä mainitase ezmäižen kerdan Vodin pätinan aigkirjas vl 1500. Baltiž-suomen augotižlibundan nimi libub kelttu-sanaspäi «pakuine». Ezmäine škol oli avaitud vl 1856 opendusenke suomen kelel i oli vhesai 1863. Nevondkundaližen aigan Koltušin suomen rahvahaline nevondkund oli vll 1926−1939.

Starai-külä (ven.: Ста́рая «vanh», suom.: Vanhakylä «vanh külä») mainitihe vspäi 1792, sijazihe Okkervilin joginiškan ojan-ližajogen randal. Ezmäine škol radaškanzi siš vl 1909. Nevondkundaližen aigan (1973. voz') «Vsevoložskii»-sovhozan keskuz oli siš.

Vn 2023 31. päiväl semendkud Leningradan agjan Käskusenandai suim vahvišti käskust Starai- i Koltuši-küliden ühtištuses. Leningradan agjan käskuz andoi udele eländpunktale lidnan statusad Koltuši-nimenke, tuli väghe sen-žo voden 25. päiväl kezakud.

Koltuši šingotase betonantegimel i raudbetontegesiden edheotandal, meblin i mebel'furnituran pästandal.

Lidn sijadase lidnankundan lodehes, Koltušin ülüdel (78 metrhasai ü.m.t.), 36..39 m ü.m.t. keskmäižel korktusel. Vedhudetoi Koltušin järv (ven.: Колтушское озеро) om koume gektarad pindanke i nell' metrad süvütte, levitase lidnan pohjoižpäivnouzmas. Matkad Vsevoložsk-rajonkeskushesai om 10 km pohjoižhe orhal vai 12 km avtotedme, Piterihesai om kümne kilometrad päivlaskmha Koltušin mantedme. Toine lähembaine lidn om Kudrovo 12 km suvipäivlaskmha avtotedme. Lähembaižed eländpunktad oma Pavlovo-žilo ani pohjoižpäivnouzmha i Janino-2-külä ani päivlaskmha-lodeheze.

Kaik om 21 irdad lidnas.

Vl 2002 Starai-külän ristitišt oli 4 466 eläjad. Vn 2010 Venäman rahvahanlugemižen mödhe Koltuši-külän eläjiden lugu oli 173 ristitud, Starai-külän 8 868 ristitud. Vl 2017 kaik 12 235 ristitud oli registriruidud sen aigan kahtes küläs. Starai-külän ristitišt oli 13 836 eläjad vl 2021. Kaikiš suremb lidnan ristitišt om nügüd'.

Ortodoksižen hristanuskondan koume pühäpertid^[1][2] oma saudud lidnas: ph. Ioann Kronštadtalaižen puine jumalanpert' (letihe vll 1996−1997) i kivine časoun' (2015−2019), mugažo saudihe phh. Petran da Pavlan jumalanpertid usadiban puištos vspäi 2019.

Professionaližen opendusen aluzkundad ratas lähižes Piteriš.

Läz kümned avtobusmaršrutad ühtenzoittas lidnad Piterinke (Ladožskai-metrostancii) i Vsevoložskanke.

Ühtennimine Koltuši-raudteplatform sijadase kahesas kilometras suvhe lidnaspäi.

• 
  Muštnik Pavel Čoglokov-jenaralale (2013)
• 
  Memorial VA-laivoiden pölištunuzile merimehile, vn 2017 nägu
• 
  Čoglokov-pomeššikan usadiban puišt vl 2022

1. ↑ Koltušin pühäpertid sobory.ru-saital. (ven.)
2. ↑ Starai-külän pühäpertid sobory.ru-saital. (ven.)

• Lidnankundan tobmuden sait (mo-koltushi.ru). (ven.)

Koltuši Vikiaitas