Dno

Dno
Дно

Lidnanznam
Valdkund	Venäma
Eläjiden lugu (2021)	7,850 ristitud
Pämez'	Gennadii Jaružnii (tal'vku 2023—, reduku 2015 — reduku 2020)
Telefonkod	+7−81 135-xx-xxx
Avtokod	60
Aigvö	UTC+3 (MSK+0)

Dno (ven.: Дно) om Venäman lidn da raudtesol'm Pskovan agjan keskuzpalan päivnouzmas. Se om Dnon rajonan i lidnankundan administrativine keskuz.

Ezmäižed küläd mainitasoiš Uz'lidnan aigkirjas 15. voz'sadan augotišel, nimitihe niid Sur' Dno (ven.: Дно Большое) i Penemb Donce (ven.: Донце Меньшое). 19. voz'sadan lopus läz 600 ristitud elihe Dno-küläs (vai Donščin, ven.: Донщина), se šingotaškanzihe raudtestancijaks «Piter — Vitebsk»- i «Pskov — Bologoje»-jonoil.

Vl 1925 Dno sai lidnan statusad. Eläjiden enambuz radab raudten edheotandoiš tähäsai, mugažo saudihe astjoiden tegint i abrazivtegint.

Lidn sijadase rajonan päivlaskmas, penen Suhovk-jogen randoil (ven.: Суховка, Šelon'-jogen i Il'mjärven bassein), 70 m ü.m.t. keskmäižel korktusel.

Om 95 km päivlaskmha matkad Pskovhasai orhal vai 110 km avtotedme. Lähembaine lidn om Porhov 26 km päivlaskmha orhal, raudtedme vai avtotedme. Molembad raudtejonod ühtenzoitasoiš lidnan röunoiš, Dno-raudtestancii radab.

Kaik 43 pen't küläd da üks' futor mülüdas lidnankundha Dnon ližaks vspäi 2015. Lidnankundan pind — 13,82 km².

Lidnankundan tobmuden pämez' om sen Deputatoiden suiman ezimez'. Edeline suiman ezimez' om Andrei Vasil'jev (reduku 2020 — tal'vku 2023). Lidnan suim i Administracii oma reorganizacijan pordhal vn 2024 elokuspäi. Edeližed lidnankundan Administracijan pämehed oma Nikolai Timofejev (viluku 2021 — eloku 2023), Ol'ga Lebedeva (eloku 2018 — viluku 2021), Vladimir Kučmistov (uhoku 2016 — eloku 2018).

Vn 2010 Venäman rahvahanlugemižen mödhe lidnan eläjiden lugu oli 9 061 ristitud (rajonan ristitišton kaks' koumandest), lidnankundan — 9 183 ristitud (ližaduihe kaks' küläd futoranke edel 2015. vot), vn 2021 lidnan — 7 850 ristitud. Vl 2017 kaik 7 855 ristitud elihe lidnas i 8 677 ristitud kaikes lidnankundas. Kaikiš suremb lidnan ristitišt oli 12 400 eläjad vl 1992.

Rahvahad (enamba 0,4 % vl 2021): venälaižed — 96,3 %, ukrainalaižed — 0,5 %, toižed rahvahad — 1,8 %, rahvahuden ozutandata — 1,4 %.

Ortodoksižen hristanuskondan koume pühäpertid^[1] oma kaičenus i saudud lidnas: Mikoi-arhangelan pühäpert' (saudihe vll 1821−1825), Stroican časoun', i Cariližiden moknikoiden jumalanpert' om sauvomas vspäi 2017.

Lapsiden opendusen aluzkundad oma severz'-se päivkodid, keskškol nomer 1, gimnazii, ližaopendusen keskuz, čomamahtoiden škol. Dnon raudtetehnikum^[2] om lidnan professionaližen opendusen aluzkundaks.

• 
  Muštnik Suren sodan vägimehile (2008)
• 
  Mikoi-arhangelan jumalanpert', vn 2013 nägu
• 
  Puruvedim-muštnik (2010)
• 
  Dno-1-raudtestancijan sauvusen i perronan nägu vl 2012

1. ↑ Dnon pühäpertid sobory.ru-saital. (ven.)
2. ↑ Dnon raudtetehnikuman sait (org1036.pskovedu.ru). (ven.)

• Municipaližen «Dno»-ühtnikan lehtpoled Dnon rajonan tobmuden aluzkundoiden saital (dno.reg60.ru). (ven.)

Dno Vikiaitas