Desnogorsk

Desnogorsk
Десногорск

Lidnanznam	Flag
Valdkund	Venäma
Eläjiden lugu (2021)	25,345 ristitud
Pind	42,89 km²
Pämez'	Anatolii Terleckii (eloku 2023—)
Telefonkod	+7−48 153-xx-xxx
Avtokod	67
Aigvö	UTC+3 (MSK+0)

Desnogorsk (ven.: Десного́рск) om Venäman lidn da lidnümbrik Smolenskan agjan suves.

Sauvoškanzihe eländpunktad i atomstancijad vspäi 1972. Vn 1974 26. päiväl uhokud registriruihe Desnogorsk-žilod oficialižešti, nimitihe jogen mödhe. AES radaškanzi vn 1982 tal'vkus. Žilo sai lidnan statusad vn 1989 31. päiväl redukud.

Desnogorsk šingotase Smolenskan atomelektrostancijal da sen abuedheotandoil, polimeriden tegimel^[1] i polimerpakuitesen tegimel.

Lidn om ümbärtud Roslavlin rajonan territorijal. Se sijadase Desn-jogen da sen vezivaradimen (ven.: Десногорское водохранилище 44 km², 193 m ü.m.t.) oiktal randal, 200 m ü.m.t. keskmäižel korktusel. AES zavodiše koumes kilometras lodeheze lidnaspäi. Täuttihe vezivaradint vll 1979−1984.

Matkad Smolenskhasai om 107 km lodeheze orhal vai 146 km avtotel. Lähembaine lidn om Roslavl' 36 km suvipäivlaskmha orhal vai 40 km avtotedme. «Roslavl' — Obninsk»-avtote mäneb koumes kilometras suvhe lidnaspäi, sen sarak tuleb lidnha. Raudte om ühtenzoittud atomelektrostancijanke 22-kilometrižel sarakol «Roslavl' — Suhiniči»-keskustaspäi.

Sosnovk-külä (35 rist. vl 2018) mülüb lidnümbrikho Desnogorskan ližaks. Lugetas kahesa nomeruidud mikrorajonad lidnas.

Municipaližen ühtnikan pämez' om sen Administracijan pämez'. Edeližed municipalitetan pämehed oma Aleksandr Novikov (sulaku 2022 — kezaku 2023) i Andrei Šubin (keväz'ku 2017 — keväz'ku 2022). Lidnan Nevondkundan ezimez' om Jelena Lednöva vn 2023 elokuspäi (velgusentäutai), edeline ezimez' om Anatolii Terleckii (kül'mku 2019 — eloku 2023).

Vl 1979 lidnan ristitišt oli 9 830 eläjad. Vn 2010 Venäman rahvahanlugemižen mödhe lidnan-lidnümbrikon eläjiden lugu oli 31 100 ristitud. Kaik 28 103 eläjad oli lidnas vl 2017. Kaikiš suremb lidnan ristitišt oli 36..37 tuhad eläjid vll 1996−2001 (37 300 rist. vll 2000−2001).

Rahvahad (2010): venälaižed — 92,5 %, ukrainalaižed — 2,3 %, vaugedvenälaižed — 2,0 %, toižed rahvahad — 3,2 %.

Ortodoksižen hristanuskondan viž pühäpertid^[2] oma saudud lidnas: Jumalanmaman «Kaikiden gorähižiden ihastuz»-jumalaižen päjumalanpert' (2009), Jumalanmaman «Äkkiline ihastuz»-jumalaižen jumalanpert' (letihe vll 2014−2017), ph. Stefan Permilaižen puine jumalanpert' (1997), Sündun Eläbzdusen časoun' (kaumžoman territorijal, 2000), ph. Jurgii-vägestusenkandajan časoun' (2022−2023).

Desnogorskan energetine kolledž^[3] om lidnan professionaližen opendusen aluzkundaks.

• 
  Hoštusen käp (2007)
• 
  Jumalanmaman «Kaikiden gorähižiden ihastuz»-jumalaižen päjumalanpert', vn 2022 nägu
• 
  Smolenskan AES vl 2013
• 
  Torguindkeskuz vl 2022
• 
  Muštnik kanzale. Tervehtoitai i kul'turkeskuz om tagamal (2014)

1. ↑ Desnogorskan polimeriden tegimen sait (dppsm.ru). (ven.)
2. ↑ Desnogorskan pühäpertid sobory.ru-saital. (ven.)
3. ↑ Desnogorskan energetižen kolledžan sait (dek67.ru). (ven.)

• Lidnümbrikon tobmuden sait (desnogorsk.admin-smolensk.ru). (ven.)

Desnogorsk Vikiaitas