Citrus

? Citrus
Citruskazmusiden levitadud plodud: limon, laim, apel'sin, mandarin
Tedoklassifikacii
Valdkund: Kazmused Palakund: Änikkazmused (Magnoliophyta) Klass: Kaksidülehtesižed (Dicotyledones) Kund: Sapindusänikoižed (Sapindales) Sugukund: Rutaižed (Rutaceae) Heim: Citrus
Latinankel'ne nimi
Cítrus (L.)
Sistematik Vikierikoiš Kuvad Vikiaitas ITIS 28882 NCBI 2706

Citrus (mugažo latinan kelel, znamoiči siš «limonpu») om igähižvihandoiden puiden i penzhiden heim. Mülüb Rutaižed-sugukundha.

Heimon erikod libudas Suvipäivnouzmaižen Azijan regionaspäi ezimeletaden, avarudel Indijan päivnouzmaspäi Tünen valdmeren sarihesai. Sel'gitadas ploduiden havadoiden mödhe, ned šingotiba kuivan aigoidme mussonižen klimatan arvoimižiš. Sil-žo aigal om tedoidusid, miše heimon kazmusiden augotižlibund om Avstralii, Uz' Gvinei i Uz' Kaledonii.

Kul'turoičend zavodihe Amuižen Kitain territorijal nell' tuhad vozid tagaz i jäi siš hätken aigan. Gibridizacii sijaližidenke citrusidenke veb erasid erikoid segotadud klassifikacijale. Nügüd'aigan om citrusplantacijoid 140 valdkundas, 35° levedushesai ekvatoralpäi molembihe polihe päpaloin.

The Plant List-andmuzbazan mödhe, kaik lugetihe 33 erikod heimos i völ 141 nimitusen status ei olend märhepandud. Sen ližaks, om äiluguižid gibridoid i sortuid, niiden kesken om honuzkazmusid. Heimon kul'turoiden ploduiden vozne satuz oli 105 mln tonnoid vll 2002−2004. Päkazvatajad oma Brazilii (apel'sinad), Kitai (greipfrutad, apel'sinad, mandarinad), Evropan Ühtištuz (mandarinad, limonad, laimad), Meksik (limonad, laimad), Argentin (limonad, laimad).

• Citrus aurantiifolia — Laim, libub Indijaspäi
• Citrus australasica — Sor'menvuitte laim
• Citrus limon — Limon
• Citrus maxima — libub Malajižes sarištospäi (Indonezii, Malaizii)
• Citrus medica — Citron, heimon tipine erik, libub Indijaspäi
• Citrus reticulata — Mandarin, libub Kitaišpäi
• Citrus sinensis — Apel'sin

Citrus Vikiaitas

Nece kirjutuz om vaiše ezitegez. Tö voit abutada meile, ku kohendat sidä da ližadat sihe.