Gorohovec

Eländpunktan aluz om pandud vl 1168 lidnuseks Vladimiran da Suzdalin ruhtinazkundan röunal tehmaha londoid Volgan Bulgarijha. Se mainitase ezmäižen kerdan Lavrentijan aigkirjas vl 1239 kuti Pühän Jumalanmaman lidn, kudambad anastajad poltiba. Edel socializman aigad lidnan metallanradoiden mastarid burlakoičiba valdkundadme, äi raudtesildoid om saudud heiden ühtnendanke.

Gorohovecan tegimišton edheotandad oma libutimiden da konvejeroiden tegim, stökoltegim, lihakombinat. Mecan i metallan ümbriradmižen cehad oma Gorohovecan kolledžan bazaks (Väznikan tehniž-ekonomižen kolledžan filial^[1]). 20. voz'sadal laivansauvomižen tegim oli olmas (3500 radnikad oleskeli). Kaikiš järedamb Evropas Gorohovecan artillerine poligon sijadase päivnouzmha lidnaspäi, agjoiden röunal.

Lidn sijadase Kläz'man oiktal randal, 80 m keskmäižel korktusel valdmeren pindan päl. Matkad Vladimirhasai om 157 km päivlaskmha «Volg»-avtotedme (M7). Gorohovec-raudtestancii sijadase 11 km suvipäivnouzmha lidnaspäi «Kovrov — Alauz'lidn»-raudtekeskustal, radab vspäi 1862.

Gorohovec om lidnankundan üks'jäine eländpunkt. Lidnfartaloiden pind om 13 km², kaiken municipalitetan — 14,75 km².

Vn 2010 Venäman rahvahanlugemižen mödhe eläjiden lugu oli 14 016 ristitud, rajonan ristitišton koume videndest. Kaikiš suremb ristitišt oli 16 600 eläjad vl 1992.

Ortodoksižen hristanuskondan nell'toštkümne pühäpertid^[2] oma kaičenus lidnas: kaks' päjumalanpertid, seičeme jumalanpertid i viž časounäd. Koume jumalankodid (17. voz'sada) da Blagoveščenjan päjumalanpert' (1700) vedatadas turistoid, vl 2017 Gorohovec tuli UNESCO:n Mail'man jäl'gusen ezinimikirjuteshe. 1900-nziden voziden erižpertid čomitadas lidnad, ned oma puspäi Evropan modern-stilinke.

Edeline lidnankundan pämez' (Nevondkundan ezimez') om Jelena Romanova (sügüz'ku 2015 — reduku 2020). Lidnankundan Administracii om likvidiruidud vn 2020 redukule, Nina Beläkova radoi sen jäl'gmäižen pämehen vn 2015 redukuspäi.

•  
  Lidnan tobmuden sauvuz (2009)
•  
  Pühän Stroican Nikol'skii-mez'jumalankodi, vn 2019 nägu
•  
  Sretenjen naižjumalankodi lidnan keskuztorgul, vn 2009 nägu
•  
  Gorohovecan rajonan keskuzläžundkodi (2021)
•  
  Gorohovec-raudtestancii Velikovo-küläs vl 2019

1. ↑ Päandmused Väznikan tehniž-ekonomižen kolledžas sen t130631.spo.obrazovanie33.ru-saital. (ven.)
2. ↑ Gorohovecan pühäpertid sobory.ru-saital. (ven.)

• Lidnan da rajonan tobmuden aluzkundoiden oficialine sait (gorohovec.ru). (ven.)
• Lidnan turistine sait (gorokhovets.ru). (ven.)