Tełevizion intełijente

Ła smart TV o in vèneto tełevixion intełijente ła defenise comersialmente ła categorìa de łe apareciadure ełetròneghe de consumo che łe ga come caratarìstega prinsipałe l'integrasion de funsion e de servisi łigài a internet, e in partegołar al cusì dito Web 2.0, rento de apareci tełevixivi. Ła stesa łocusion ła xe doparà in maniera pì xenèrega par defenir ła tendensa a ła converjensa tegnołòxega intrà el mondo de i personal computer e cueło de ła tełevixion.

Sti dispoxidivi cuà, traverso del coligamento a ła rete, i dà ła posibiłità de gòdar de servisi online tipegamente destinài a normałi personal computer, cofà navigasion internet, video on demand, Internet TV, multimediałità, servisi in streaming, social network, evc., mantenjendo o potensiando serte caratarìsteghe de interatività de i tełevixori e de i dispoxidivi cołegài mesi in comersio dopo de ła nàsita de ła tełevixion dijitałe terestre e satełitare.

L'apeładivo smart (traduxìbiłe da ła łengua ingrexe cofà "intełijente") el xe stà doparà par 'sta categorìa de dispoxidivi inte ła stesa maniera de cuel chel xe suceso inte el mondo de ła tełefonìa mòbiłe co l'introdusion de i smartphone, a dir tełèfoni sełułari dotài de caratarìsteghe progredìe multimediałe e intarative.

Ła tecnołoxìa de baxe del conseto de smart TV ła pol èsar integrà inte el interior del parécio tełevixivo o sanò ła pol èsar mesa a dispoxision traerso de set-top box, sia a dir dispoxidivi esterni destinài a far crésar łe funsionałità dei tełevixori tradisionałi, cusì come a l'interno de łetori de dischi òteghi, console par xugar, sistemi tełevixivi sentrałixài.