Storia del Mozanbico

Come par quasi tuti i paexi africani a sud del Sahara, i primi abitanti del Mozanbico i xera boscimani, tanto probabilmente de lo steso grupo che ghe darà vita a i san. Le piture ruprestri che se cata su tanti monti del Mozanbico i xe na testimoniansa direta che i boscimani i vivea qi almanco 10.000 a.C. I bantu i xe rivà in tel nord del Mozanbico traverso el Fiume Zamnbesi, za in tel VI secolo de la nostra era. I bantu i ga portà la metalurgia e l’agricoltura.

Portoghexi

Cexa de San Antonio su l’ìzoła de Mozanbico

I arabi i xe rivà su le coste del nord del Mozanbico in tel XI secolo. I ga costruio de i insediamenti e promoso la difusion de l’Islam. Le varie sità de cultura swahili le gavea i so sultani. Ancora ancò, al nord del Mozanbico la zente del nord la parla lengoe locali e na variante del swahili. En nome steso del paexe el vien dal el nome de on sultan locale: Musa bin Bichi (o Bi’ki)

El primo eoropeo a rivar so le cost del Mozanbico in epoca moderna el xe stà Vasco da Gama in tel 1498. I portoghexi i ga costruio na serie d efortini longo la costa e meso la cavedal de la nova colonia a l’Ixola de Mozanbico, a la boca de la baia de Mossuril, in fronte de la Cabeceira Grande. I portoghexi no ga mai tentà l’esplorasion de l’interno e anca i forti so la costa i no xera ben tegnui. En tel XIX secolo, spinti da le mose espansionistiche de i altri paexi eoropei, i portoghexi i ga deciso de sfrutar el interno de le so colonie. I ga diviso el teritorio del Mozanbico in prazos, grandi propietà teriere date a i portoghexi che volea investir in Africa. I portoghexi i ga svilupà solo le infrastruture che servia a i coloni e i no ga dato inportansa a la popolasion locale.

Indipendensa

Co el resto de i paexi africani i rivava a l’idipendensa, el Portogalo el no volea consedar l’autonomia a le so colonie. El ditator Antonio de Oliveira Salazar el sostegnea che i teritori de oltremare i xera parte de la nasion. I africani i no ghe credea, visto che el Portogalo el faxea poco par lo svilupo e l’educasion. En tute le colonie (Angola, Guinea Bissau, Ixole de Cao Verde, e Mozanbico) se sa formà de i partii de oposision. En tel 1962, vari grupi mozanbicani i se sa riunio in tel Fronte par la Liberasion del Mozanbico (FRELIMO) e scominsià la guera de liberasion in tel 1964. En tel april 1974, el FRELIMO el xe riusì a ciapar la cavedal, Maputo. El paexe el xe diventà indipendente el 25 giunio 1975. I portoghexi i ga lasà el paexe, co no ghera personal local bon de mandar vanti tute le atività specializade. El FRELIMO el se sa alinea co la Rusia.

Guera Sivile

La mancanza de svilupo, la povertà, e ragioni de pułìtega internasionale le ga portà el paexe a la guera sivile. En tel 1982, la RENAMO – on grupo anticomunista sostegnù da Sudafrica, Rhodesia (Zinbabwe de ancò) e da i Stati Unii – la ga scominsià na campagna de atachi violenti a scole, dispensari e vie de trasporto. En tel 1984, Mozanbico e Sudafrica i ga firma i acordi de Nkomati. El Mozanbico el se impegnava a parar fora i guerilieri de l’African National Congress (ANC) dal paexe, e el Sudafrica el gavaria smeso de darghe armi a la RENAMO. El Mozanbico el ga fato la so parte, ma el Sudafrica nol xe stà a i pati e el ga continuà a darghe armi a la RENAMO. En tel 1986, el presidente Samora Machel el xe morto in on incidente aereo, tanti i sospeta che el governo del Sudafrica el sia responsabile. Al so posto, Joaquim Chissano el xe diventà presidente.

En tel 1990, Chissano el ga scominsià el dialogo par rivar a la paxe co la RENAMO. EL dialogo el xe stà sostegnù da la Comunità de Sant’Egidio, on grupo catolico de Roma. El 4 otobre 1992, Joaquim Chissano e Alfonso Dhlakama – cao de la RENAMO – i ga firmà l’acordo de paxe a Roma.

Democrazia

Armando Emílio Guebuza, Presidente del Mozanbico

A le prime elesioni libare, in tel 1994, Chissano el ga vinto la magioria d ei voti, e Dhlakama el xe rivà secondo. En tel 1995, el Mozanbico el sa zontà al Commonwealth, unico paexe che nol xe mai stà parte del impero britanico. I rifugiati mozanbicani scapai a l’estero (2 milioni) o in altre aree del paexe (4 milioni) i xe tornà a casa par le fin del 1996. Dopo le elesioni del 1999, la RENAMO la ga acusà el FRELIMO de verghe imbroià a le elesioni. En tel 2005, Chissano el se sa ritirà e ga dato via libara al novo presidente Armando Guebuza.

El paexe el xe generalmente tranquilo. La zente la laora e serca de svilupar le struture. Lo steso no se pol dir del governo. I gironalisti che i ga investigà l’uso de i soldi da parte de i pułìteghi pi grsoi i xe stà malmenà e anca copà (omicidio Cardoso). Ancò, el sud del paexe el xe sempre pi moderno e l’inglexe el xe sempre pi parlà. El nord el xe restà sotosvilupà e le infrastruture le xe inadeguate. L’università statale la xe a Maputo, mentre che al nord ghe xe l’università catolegha. Tute e do ste realtà le xe al de soto de i bisogni del paexe.

Portałi