Adam i Eva

Adam i Eva ta piki un apel for di e palu di konosementu di bon i malu. (Cornelis van Haarlem, 1592, Rijksmuseum Amsterdam)

Adam i Eva ta wòrdu ekspulsá for di paraiso. (Charles-Joseph Natoire, 1740)

Adam i Eva ta, segun e mito di kreashon di e religionnan abrahamiko, e promé hòmber i muhé. Nan ta sentral den e kreensia ku henter humanidat ta un famia, desendiente di un solo par di antepasadonan original. Nan historia tambe ta forma e fundeshi pa e doktrinanan kristian di e Kaida di Hende i piká original—kreensianan ku ta signifikante den Kristianismo pero no ta kompartí den Hudaismo òf Islam.

Génesis ta kontené dos kuenta di kreashon tokante kon Dios a krea Adam ku Eva:

• Den e promé kuenta (Génesis 1:1-2:3) el a krea nan na mes momentu, hòmber i muhé i na su semehansa.

Anto Dios a bendishoná nan, i a bisa nan: "Sea fruktífero i multipliká, i yena e tera i hasi esaki someté na bo; i goberná riba e piskánan di laman i riba e parhanan di shelu, i riba tur ser bibu ku ta move riba tera."

—Génesis 1:28

• Den e di dos historia (Génesis 2:4 - 2:24) el a krea Adam promé:

E ora ei señor Dios a forma hende di e stòf di tera i a supla e rosea di bida den su nanishi; i hende a bira un ser bibu.

—Génesis 2:7

Dios a pone Adam den e Hòfi di Eden (paraiso) i a bis'é ku e por a kome fruta di kualke palu den e hòfi ku eksepshon di e palu di konosementu di bon i malu. Algun tempu despues, Dios a konstruí Eva for di e repchi di Adam (Génesis 2:21–22).

Un kolebra a tenta Eva pa kome e fruta di e palu di konosementu di bon i malu. Tambe el a duna Adam, kende tambe a komé. Na e momentu ei nan a bira konsiente ku nan tabata sunu i a haña bèrgwensa di esaki (Génesis 3:1–7).

Despues di Adam ku Eva su desobedensia, Dios a kondená nan: "pasobra bo ta stòf, na stòf bo ta bolbe." E ora ei Dios kier a stroba Adam ku Eva di kome di e palu di bida, ku tambe tabata den e Hòfi di Edén, pasobra e ora ei nan lo a biba pa semper. Asina Dios a saka nan for di e Hòfi di Edén i a pone kerubinnan serka di e hòfi pa warda e entrada.

Despues di nan ekspulshon for di e Hòfi di Edén, Adam mester a perkurá rekurso di bida miéntras ku Eva tabata haña yu. Tres yu hòmber ta wòrdu menshoná pa nòmber: Kain, Abel i despues Set.