Ortografia di Papiamento

Durante aña 1976 Gobierno di Aruba a aproba e ortografia di Aruba, cu a drenta na vigor na aña 1977.^[1]

Na aña 1992 Minister di Bienestar General a nombra un comision cu e meta pa reformula, elabora y amplia e ortografia oficial. Cu otro palabra pa haci e reglanan mas cla, mas comprendibel y facil pa aplica. Sinembargo nunca a logra oficialisa e version amplia y adapta di ortografia.

Departamento di Enseñansa a bolbe inventarisa tur comentario y recomendacion di diferente instancia den comunidad na final di aña 2006 y durante 2007. Despues cu a analisa y adapta e ortografia amplia a presenta na Minister di Enseñansa "Ortografia di Papiamento- version juni 2007" cu e peticion pa inicia e proceso di legislacion. Na juli 2007 Parlamento di Aruba a expresa su sentimento positivo pa cuminsa uza e ortografia aki en espera di su legislacion.

E reglanan cu ta sigui ta un resumen simpel di e reglanan describi den "Ortografia di Aruba - version 2009".

No ta skirbi nomber di dia ni luna cu letter grandi. Solamente na cuminsamento di frase ta skirbi nan cu letter grandi (mayusculo).

Entre e fecha y e luna mester bin preposicion 'di'. Ehempel: 22 di september 2009

Nos ta pone dilanti di e vocalnan a, o y u cu e letter c pa representa e zonido [k]

• a= cas - caminda - caha
• o= cos - coy - kico
• u= cura - cunucu - cacalaca

Tambe dilanti e consonantenan l, n, r y t ta skirbi letter c pa duna e zonido [k]

Ehempel: tecnica - cla - conecta

Nota: nos ta skirbi klapchi cu "k", ta bini di klap (Hulandes), dus klapchi

Ta skirbi e y i semper cu letter k pa representa e zonido [k]

• e= kens - keiro - kere
• i= kier - kishiki - kilo

Nos ta pone dilanti di e vocalnan a, o y u cu e letter s pa representa e zonido [s]

• a= saya - sucu
• o= solo - soda
• u= sucu - supla

Tin palabra cu ta skirbi cu 'sc' pa zonido [s]

Ehempel: adolescente, discipel, escena, piscina

Ta skirbi ce y ci na final di verbo: crece, merece, conoce, gradici, haci, traduci. Ta mantene 'c' den derivacion: merecidamente, haciendo.

Ta skirbi 'c' dilanti di ia of io den e ultimo silaba: caricia, cancion, social, distancia. Tambe tur derivacion: socialisacion

Tin palabra caminda ta skirbi letter c pa representa zonido [s]. Ehempel: centro, cedula, ciego, docente, placer, ricibi

• Ta skirbi "cion" pa silaba final [shon]: educacion, posicion, mantencion.
• Ta skirbi "sion" pa silaba final [shon]: admision, decision, expresion.
• Ta skirbi "xion" pa silaba final [shon]: conexion, crucifixion, reflexion.

Tin 4 digrafo den Papiamento, tin digrafo memey di un palabra tambe.

• ch= choller - cacho - prikichi
• sh= shon - pushi - cushina
• zj= sanzjen - zjeito - zjilet
• dj= djaca - djente - indjan

Ta dos zonido tras di otro cu ta no ta separabel, por ehempel:

• yen - antiguo - rabia - leu

Ora tin tres zonido tras di otro cu no ta separabel, por ehempel:

• bieu - buey - cueyo

Nos ta skirbi ay, ey, oy, uy na final di palabra, por ehempel:

• ay= cay - bay - caray - gay (homber)
• ey= aworey - p'esey - t'ey - bedey - batrey
• oy= coy - morocoy - haudoy - gogoy
• uy= huy - puy - cuy - spruy

Contraccion ta nifica: pega pa palabra na otro na momento cu zonido cay afo. Ta uza apostrof unda zonido a cay afo. Ehempel:

• Ta asina - t'asina
• No ta berdad - N' ta berdad
• Boter di awa - Botr'i awa
• E ta aki - E t'aki

Tuma nota cu ta laga espacio solamente den caso di negacion: no: mi n' sa. Uza incorecto di apostrof ta por ehempel: dal'e dos 'or. Aki zonido no a cay afo.

Den algun caso e forma los no ta usual. E ta skirbi e forma contrai cu apostrof.

• Mi a cumpra e buki => Mi a cumpra e (no ta zona bon) => Mi a cumpr'e
• Conta Buchi e storia => Conta e e storia (no ta zona bon) => Cont'e e storia.

Ta skirbi semper cu apostrof: cuant'or, cuat'or, cinc'or, shet'or, och'or, cambi'e

Numeral di 11 te 99 ta skirbi hunto:

• 26= bintiseis
• 32= trintidos
• 49= cuarentinuebe

Numeral riba 100 ta skirbi separa, menos e partinan di 11 - 99:

• 3.247= tres mil dos shen y cuarentishete/ tres mil dos shent'y cuarentishete of tres mil dos shento y cuarentishete/ tres mil dos cien y cuarentishete.

• 240= dos shen y cuarenta/ dos cien y cuarenta/ dos shento y cuarenta/ dos shent'y cuarenta

Mag di skirbi cien, shen, shento, shent'y (Ortografia - version april 2009)

• adopta: tum'e textualmente over, skirbi segun e idioma di origen.
• adapta: fia y cambi'e segun e reglanan di Papiamento.

En general nos ta adapta palabra cu ta bini di Spaño y ta skirbi e segun ortografia di Papiamento. Tin palabra cu a wordo adopta, ehempel: a la parilla, quesillo, quehaceres, cumpleaños etc.

Mag di skirbi sustantivo cu na Spaño ta skirbi eza of esa, ehempel: alabansa/alabanza, enseñanza/enseñansa etc. Excepcion: andansa, lansa

Tin palabra cu mag di skirbi cu letter z na final pa e zonido [s], ehempel: feliz, luz, paz, cruz etc.

Ta adopta palabra cu ta bin di Hulandes, Ingles y Frances, si no tin cambio den pronuncacion, ehempel: appel, belasting, bezig. Palabra cu ta bin di Ingles ta skirbi segun e ultimo edicion di diccionario Merriam-Webster, ehempel: catch, computer, screen. Palabra cu ta bin di Frances ta skirbi segun e reglanan ortografico di Hulandes vigente, ehempel cheque, creche, enquete.

Si ta bin cambio den zonido, cu a bin acerca of a cambia anto ta cambi'e. Ehempel: boek-buki, kopje- copi etc.

Palabra cu ta bin di otro idioma ta skirbi letterlijk over, ehempel: spaghetti, status quo, razzia. Excepcion: bancarota. Sustantivo cu ta bin di Aleman ta skirbi cu letter chikito. Abreviacion di palabara Latin ta skirbi segun e ortografia Hulandes vigente, ehempel: PS, NB, L.S.

Un idioma tin diferente manera pa traha palabra nobo. Asina un idioma por compone, deriva y fia palabra. Tur idioma ta fia di otro. Asina Papiamento tambe a y ta fia di Spaño, Hulandes, Ingles, Portugues, Frances y di algun lenga Africano manera Bantu y Kwa y algun lenga Arawak manera Taino y Caquetio. Aki tin algun ehempel.

• Comision di Ortografia
• Ortografia di papiamentu (Boneiro y Corsou)

• Papiamento.aw website oficial
• Ortografia di Papiamento (PDF) Version 2009
• Vocabulario di Papiamento (PDF) Version 2009
• Gramatica di Papiamento (PDF) Version 2008
• Landsverordening van 12 november 2018 houdende regels met betrekking tot de schrijfwijze van het Papiamento (Landsverordening schrijfwijze Papiamento)