Bonaire National Marine Park

Bonaire National Marine Park (BNMP) ta e reserva marino di mas bieu na mundu.^[1] E ta enserá e laman ront di e islanan Boneiru i Klein Bonaire for di e liña di awa altu te ku 60 meter di profundidat. E parke a keda establesé na 1979 i ta konsistí di 27 km² di ref di koral, mondinan di yerba di laman i di mangel. E ta inkluí tambe dos zona húmedo segun e "Konvenshon di Ramsar", esta e laguna di Lac i Klein Bonaire.^[2]

Bonaire National Marine Park
Kategoria di IUCN II (Parke Nashonal)
Geografia
Pais	Hulanda
Koordinatonan	12°10′59.99″N 68°19′59.99″W / 12.1833306°N 68.3333306°W / 12.1833306; -68.3333306
Informashon básiko
Área	26 km²
Fundashon	1979 (funda) 1999 (Parke Nashonal)
Maneho	STINAPA Boneiru
Imágennan riba Wikimedia Commons
[Editá Wikidata] · [Manual]

Na aña 1999 BNMP a risibí e status di 'parke nashonal' di Antias Hulandes. Na 2001 Klein Bonaire, isla chikitu inhabitá, a wòrdu agregá na e parke marino komo un zona di naturalesa legalmente protehá. Den laman west di Boneiru tin yen di lugánan di buseo ku ta fásil pa yega for di e kosta. Pa buseadónan e lugánan di buseo rondó di Klein Bonaire ta aksesibel ku boto. Ku eksepshon di un área chikitu, akseso na e parke bou awa ta kompletamente liber pa buseadónan.

Loke ta úniko na BNMP ta ku e ta funshoná riba su mes entrada (sin subsidio). E fondonan ta bini for di un entrada ku ta kobra pa buseadó. Otro usuario, manera landadó, koredó di surf i kiteboard, kayakista i deportistanan akuátiko, ta paga un preis di entrada mas abou. Esaki simultaneamente ta duna entrada na e Washington Slagbaai National Park. Ademas di protekshon di naturalesa, e parke marino ta enkargá ku informashon pa turista tokante buseo responsabel i mantenshon di buinan pa barkunan ku buseadó. E maneho di e parke marino ta den man di STINAPA Boneiru ku tambe ta manehá Washington Slagbaai National Park. Piskadónan tambe tin entrada na e parke marino, pero nan reda mester ta sertifiká pa STINAPA Boneiru.

• 
  Zeekát buladó (Sepioteuthis sepioidea) dilanti kosta di Boneiru.
• 
  Astrophyton muricatum, anochi na ref Bari.