Simon Ostrovsky

Simon Ostrovsky (Russia, 2 de febrièr de 1981) es un jornalista e realizador israeloamerican. Es un jornalista independent d'investigacion que realiza de documentaris qu'an per tòca de mostrar e denonciar la corrupcion e las marridas condicions de vida dins las societats visitadas. A realizat un bon nombre de documentaris per mantun canal de television internacional coma l'american HBO, l'arab Al Jazeera o l'anglés BBC. Segon Wikileaks foguèt gràcias a el que los enfants d'Ozbequistan se vegèron pas mai forçats de trabalhar a la culhida del coton per las industrias internacionalas textilas.

Trabalha actualament per la seccion mèdias de la revista Vice. A realizat en 2014 una tièra de documentaris sonats Russian Roulette, per Vice News, a prepaus de la situacion politica d'Ucraïna en penetrar dins l'intimitat dels divèrses movements separatistas de l'èst del país.

Foguèt arrestat lo 21 d'abril de 2014 e posteriorament gardat coma ostatge amassa amb una jornalista ucraïniana, Irma Krat, a Sloviansk per las fòrças pro-russas capitanejadas per Viacheslav Ponomarev. Per encausa de las pressions internacionalas se vegèt finalament liberat tres jorns mai tard, lo vèspre del 24 d'abril.

Confessèt qualque temps aprèp sa liberacion qu'èra estat violentat pels insurgents pro-russes durant son empresonament.