Pistolet

Lei premiers pistolets son apareguts au sègle XV. La pus anciana mencion d'una utilizacion sus un prat batalhier data dau 29 de març de 1461 a la batalha de Towton en Anglatèrra. Aqueleis armas èran pesucas e avián un canon unic qu'èra cargat per la boca e un sistèma de fuòc basat sus un rodet e una mecha. Èra dotada de massas metallicas que permetián de picar un adversari au còrs a còrs. Fins au sègle XIX, de progrès permetèron de fiabilizar lo tir gràcias a l'introduccion de platinas de peirard per produrre la beluga requista. Pasmens, l'invencion dau revòuver e de son barilhet, entraïnèt un certan declin dau pistolet.

Son retorn aguèt luòc au començament dau sègle XX amb la concepcion de cargaires eficaç permetent de concebre d'armas dotadas de magazins contenent un desenau de cartochas. Un autre factor determinant foguèt l'invencion de pistolet permetent un tir automatic. A partir deis ans 1900-1910, divèrseis invencions permetèron de melhorar la fisabilitat dei mecanismes e la precision dei tirs e, durant la segonda mitat dau sègle XX, lei pistolets remplacèron pauc a pauc lei revòuvers dins un nombre important de domenis^[1].

•  
  Pistolet de peirard de la fin dau sègle XVIII (vèrs 1795)
•  
  Luger P08 (1898)
•  
  Pistolet francés utilizat dins la marina au sègle XIX (modèl 1837)
•  
  Colt M1911 (1911)
•  
  Beretta M9 9mm (ans 1980)

Un pistolet modèrne es compausat d'una ponhada, d'un sistèma de mira, d'un sistèma de tir, d'un cargaire, d'un canon raiat e de sistèmas de seguretat. La ponhada permet de tenir l'arma corrèctament. Lo sistèma de mira es generalament constituït d'una auça e d'un ponch de mira. Pasmens, pòu de còps èsser pus sofisticat amb l'integracion d'una luneta o d'un lasèr. Lo sistèma de tir es basat sus un ensemble de ressòrts liats a la destenduda, au chin e au percutaire. Permet d'entraïnar la percussion de la cartocha. Lo projectil es alora propulsat dins lo canon que li dòna un movement de rotacion permetent d'estabilizar sa trajectòria.

Lei municions pus frequentas tiradas per lei pistolets an un calibre que va de 7 a 12 mm. Permèton generalament s'assegurar de tirs eficaç a de portadas de 30 a 50 m. Son ansin fòrça utilizats per lei fòrças de seguretat (polícia, gendarmariá...) o per lei fòrças militaras. Existís egalement de competicions esportivas.

• Arma de fuòc.
• Revòuver.

1. ↑ Au començament dau sègle XXI, lei revòuvers demòran fòrça utilizats per lei situacions necessitant una poissança de fuòc importanta car permèton sovent de tirar de municions pus poderosas.