Dirigible militar
Un dirigible militar es un balon dirigible utilizat per assegurar de foncions militars coma la reconoissença, la susvelhança ò lo bombardament. Utilizats durant la premiera mitat dau sègle XX, venguèron rapidament obsolèts en causa dau desvolopament de l'aviacion militara.
Istòria
modificarApareguts au començament dau sègle XX, principalament en França e en Alemanha, lei dirigibles foguèron l'enjòc d'una corsa ais armaments fòrça mediatizadas entre lei grandei poissanças dau periòde. Pasmens, tre 1914, l'aparicion de la caça aeriana e de la defensa antiaeriana limitèt son usatge a de missions nuechencas ò a d'operacions dins de regions alunchadas dei basas aerianas. Durant la Premiera Guèrra Mondiala, lei dirigibles militars foguèron donc subretot utilizats per la reconoissença e lo bombardament nuechenc dins lo camp alemand ò per la susvelhança dei rotas maritimas e la lucha antisosmarina dins lo camp aliat.
Durant l'entre doas guèrras, plusors país crompèron de dirigibles inutilizats per França, Itàlia ò lo Reiaume Unit. D'efiech, en causa de l'autonòmia encara limitada deis avions, lo dirigible aviá totjorn un certan interès per la susvelhança. Pasmens, d'accidents grèus, per exemple 50 mòrts dins l'explosion dau Dixmude en 1923, entraïnèron l'abandon definitiu dei dirigibles militars per lei Francés e lei Britanics. Ansin, durant la Segonda Guèrra Mondiala, leis Estats Units foguèron l'unica poissança qu'utilizèt de dirigibles per de missions de susvelhança maritima. Pasmens, amb 154 dirigibles construchs, aqueu ròtle foguèt marginau.
En 1946, totei lei dirigibles estatsunidencs foguèron mandats dins la resèrva. Quauquei modèls foguèron utilizats durant d'assais nuclears per observar leis efiechs d'una explosion nucleara sus aqueu tipe de veïcul. Dins leis ans 1990, plusors armadas estudièron la possibilitat d'utilizar de dirigibles automatics per susvelhar un teatre d'operacions. Pasmens, aqueleis armas semblan principalament adaptats a de teatres d'operacions pauc actius (guerilha...) ò a de missions de susvelhança au profiech de la polícia. D'efiech, lei dirigibles son totjorn fòrça vulnerables ai projectils antiaerians. De mai, lo dròne sembla desenant pus eficaça per realizar aquelei missions.
Annèxas
modificarLiames intèrnes
modificarBibliografia
modificar- (fr) Maurice de Brunoff, L'Aéronautique pendant la guerre mondiale, Ed. Maurice de Brunoff, 1919.
- (en) Ian Castle, The Zeppelin Base Raids : Germany 1914, Osprey Publishing, coll. « Raid » (n° 18), 2011.
- (fr) Stéphane Nicolaou, Les Premiers Dirigeables français, ETAI / le Musée de l'air et de l'espace, coll. « Envols », 1997.