Hizbullah
Hizbullah (en arabi حزب الله = Hizbullah, «Partit de Dieu»; en anglés Hizbullah o Hezbollah) es un grop islamista shiita e un partit politic basat en Liban. Se fondèt en junh de 1982 mas se revelèt publicament en febrièr de 1985. Sas activitats paramilitaras son supervisadas pel Conselh Central Jihadista. Aquela organizacion la qualifican de còps que i a de «jihadista shiita». Foguèt creada en seguida de l'intervencion militara israeliana en Liban en 1982 e s'apièja sus lo finançament d'Iran, qu'es precisament un Estat amb un regim shiita e islamista.
Los Estats Units, Canadà, Austràlia, los Païses Basses e Bahrayn an plaçat Hizbullah sus lor lista de las organizacions terroristas. Dempuèi lo 22 de julhet de 2013, l'Union Europèa lo classa tanben coma organizacion terrorista. Dempuèi lo 2 de març de 2016, sièis païses arabis del Golf Persic, que son en rivalitat amb Iran, tanben considèran Hizbullah coma una organizacion terrorista. Dempuei l'11 de març de 2016, tanben la Liga Aràbia considèra qu'Hizbullah fa de terrorisme.