Guttorm Hansen

Guttorm Hansen (3. november 1920–2. april 2009) var ein norsk journalist, politikar og forfattar, fødd og død i Namsos. Han representerte Arbeidarpartiet på Stortinget frå 1961-85, tingperiodane 1973-77 og 1977-81 var han stortingspresident.

Guttorm Hansen
Fødd	3. november 1920 Namsos
Død	2. april 2009 (88 år)
Statsborgar av	Noreg
Parti	Arbeidarpartiet
Yrke	politikar, redaktør, skribent
Verv	Stortingspresident i Noreg 1973-1981
Føregangar	Leif Granli
Etterfylgjar	Per Hysing-Dahl
Alle verv	stortingsrepresentant (1961–1965) stortingspresident (1973–1981) vararepresentant til Stortinget (1958–1961) stortingsrepresentant (1965–1969) stortingsrepresentant (1969–1973) stortingsrepresentant (1973–1977) stortingsrepresentant (1977–1981) stortingsrepresentant (1981–1985)

Hansen var son til ein mekanikar og arbeidde sjølv som mekanikar frå 1936 til 1945. I 1945 byrja han å arbeide som journalist og redaksjonssekretær i Menneskevennen, medlemsbladet til Det Norske Totalavholdsselskap. Etter tre år i Menneskevennen var han i perioden 1948-51 redaktør i Firdaposten. Deretter var han i ti år journalist i Namdal Arbeiderblad på heimstaden Namsos, til dess han vart vald inn på Stortinget hausten 1961.

Hansen møtte som vararepresentant frå valkrinsen Nord-Trøndelag også i perioden 1958-61. Men frå 1961 hadde han fast plass på Tinget i 24 år. Under den fyrste Bratteli-regjeringa, 1971-72, var han parlamentarisk leier for Arbeiderpartiet si stortingsgruppe. Då det nye Stortinget konstituerte seg i oktober 1973 vart han vald til stortingspresident, eit ombod han vart attvald til i 1977.

Hansen var i alle år ein friluftsmann, og var i 1963 sentral i arbeidet med å verne Børgefjell nasjonalpark. Seinare skreiv han bok om Børgefjell, og fleire bøker om mellom anna politikk og lokalhistorie.