Bjerknessenteret

Bjerknessenteret er det største naturvitskaplege klimasenteret i Norden.^[1] Senteret har særleg fokus på høge breiddegrader og formidlar kunnskap om klimaendringar for forskarar, politikarar, industri og publikum – fordelt på fire hovudområder: globalt klima, klimafarar, polarklima og karbonsystemet.^[2]

Den vitskaplege staben består av meir enn 200 forskarar og studentar frå over 30 nasjonar. Forskarane er rekruttert frå fleire fagområde, med forankring i meteorologi, oseanografi, geologi, fysikk og matematikk. Samarbeid på tvers av faggrenser og forvaltningsnivå står sentralt i organisasjonen.

Bjerknessenteret var ei av fire grupper i Europa som leverte globale klimascenarioer til første del av den fjerde klimarapporten til FNs klimapanel (Intergovernmental Panel on Climate Change (IPCC), lansert i februar 2007). Åtte forskarar ved senteret medverka til skrivinga av denne rapporten. FNs klimapanel vart tildelt Nobels fredspris hausten same år.

Senteret vart i 2013 tildelt Christieprisen, utdelt av Universitetet i Bergen til mottakarar som har «bidratt til å fremme eller synliggjøre universitetets sentrale rolle i samfunnsutviklingen».

Direktør ved Bjerknessenteret er forskar Kikki Kleiven ved Universitetet i Bergen.

1. ↑ «Han gjorde Bergen til hovudstad for klimaforsking», pahoyden.no (på norsk), 6. mars 2017, arkivert frå originalen 15. august 2020, henta 4. oktober 2019 
2. ↑ «Bjerknessenteret for klimaforskning», Bjerknessenteret for klimaforskning (på norsk bokmål), henta 4. oktober 2019 

• Bjerknessenteret for klimaforskning (BCCR)
• Havforskningsinstituttet (HI)
• Intergovernmental Panel on Climate Change (IPCC); Fjerde hovedrapport (AR4) (på engelsk); Oppsummering av fjerde hovedrapport (på norsk)
• Nansensenter for miljø og fjernmåling (NERSC)
• Norges forskningsråd
• Universitetet i Bergen (UiB)
• NORCE Research Centre