Wolfgang Unzicker

Wolfgang Unzicker (* 26. Juni 1925^[1] in Pirmasens; † 20. April 2006 in Albufeira) weer en düütsch Schachmeester.

Wolfgang Unzicker weer de Söhn vun den Studienperfesser Eugen Unzicker (1884–1976), de in den 1920er Johren Schachturniere organiseeren dee un Lehrer an dat Theresien-Gymnasium in München weer, dat ok sien Söhn bit to‘n Abitur 1944 besöcht hett. Vun sien Vader hett Unzicker in‘n Sömmer 1935 dat Schachspeel bibrocht kreegen. He hett gau Fortschritte maakt un wurr 1939 to en vun Willi Schlage leit Talentsichtung nah Fürstenwalde/Spree inlaaden, wo he ünner annern ok Klaus Junge kennenlehrt hett. Unzicker wurr to’n Rieksarbeitsdeenst herantrucken un hett ok de Grundutbillen vun de Wehrmacht maakt, wurr aber 1944 wegen en swaak Hart utmustert. 1948 fung he en Jurastudium an de Ludwig-Maximilians-Universität München an.

Vun Berop Jurist, hett Wolfgang Unzicker Schach nie as Profi bedreeven. He hett tonächst as Beamter in de Regeeren vun Böverbayern arbeit, af 1971 as Richter un later Vösitten Richter an dat Verwaltungsgericht München. För de Deelnahm an Schachturnieren hett he sück jewiels Urlaub nommen.

In de 1950er un 1960er Johren weer he de starkste Speler vun Düütschland. Markant weer sien verblüffend Gedächtnis. In internatschonalen Turnieren hett he mehrfack eerste Plätze beleggt, so etwa 1948 in Luzern (vör Eduard Spanjaard un Friedrich Sämisch), 1949 in Heidelbarg (vör Nicolas Rossolimo, Albéric O'Kelly de Galway, Georg Kieninger un Paul Felix Schmidt) ^[2], 1950 in Travemünn (vör Efim Bogoljubow]]), 1950/51 in Hastings, 1951/52 in Luzern, 1954 in dat Zonenturnier München (vör Braslav Rabar un Johannes Hendrikus Donner), 1965 in Soci, 1967 in Maribor un 1967 in Krems. 1966 wurr he bi den Piatigorsky-Cup, en vun de historschen Superturniere, in Santa Monica Veert un leeg dormit vör den dormaligen Weltmeester Tigran Petrosjan, Samuel Reshevsky, Miguel Najdorf, Borislav Ivkov un Johannes Hendrikus Donner. Ok in latere Johren kunn he sien Speelstärkt lang up en hooch Niveau hollen un reck Turniersiege in Amsterdam 1980 (IBM-II), Almada 1988, Daugavpils 1990 (deelt mit Alexei Schirow) un Amsterdam 1994. Sien best Elo-Eenzelleistung hett he 1979 bi en Turnier in Süüdafrika 1979 schafft, bi dat he achter den dormaligen Viezweltmeester Viktor Kortschnoi den tweeten Platz belegg.

1950 wurr he Internatschonaler Meester. Den Grootmeestertitel kreeg he 1954 vun de FIDE tospraaken.^[3]

Tüschen 1948 un 1965 wunn he söben Mal de Düütsch Meesterschap, nämlich 1948 in Essen (Westdüütsch Meester)^[4], 1950 in Bad Pyrmont (BRD-Meester), 1953 in Berlin (BRD-Meester)^[5], 1953 in Leipzig (gesamtdüütsch Meester), 1959 in Nürnbarg, 1963^[6] in Bad Pyrmont un 1965^[7] in Bad Aibling (gemeensam mit Helmut Pfleger).

1956 verlor he in Hamborg en Früendschapswettkamp gegen Paul Keres mit 6:2 (+0 =4 −4). Disse Wettkamp is alleen all dorüm bemarkenswert, wiel in all acht Partien dat Spaansch Anspeel speelt wurr. 1958 wurr he Internatschonaler Schiedsrichter för Schachkompositschoon för Studien.^[8]

To’n Anlaat vun sien 80. Gebortsdag wurr in’n Rahmen vun de Chess Classics Mainz 2005 en düppelrundiges Schnellschachturnier to sien Ehren utricht, in den he to’n Afsluss vun sien Loopbahn nochmals up Anatoli Karpow, Viktor Kortschnoi un Boris Spasski drapen dee.

Unzicker sien best Elo-Tall weer 2545 in‘n Juli 1971, vör Inführen vun de Elo-Tallen bedrooch sien best historsch Elo-Tall 2686 in‘n Juli 1960.

Unzicker is wiels en Urlaubsreis in Portugal an Hartverseggen storven.

Unzicker nahm an de Schacholympiaden 1950, 1954, 1956, 1958, 1960, 1962, 1964, 1968, 1970, 1974, 1976, 1978 un 1982 deell. An‘n spoodrieksten weer he 1950, as he mit de Mannschap den darten Platz recken un dat best Eenzelergevnis an dat 1. Brett haalen dee. Mit de Mannschap keem he 1964 npchmal up den darten Platz.^[9] An de Endrunn vun de Mannschapseuropameesterschap hett Unzicker 1957, 1961, 1965, 1973 un 1977 deelnommen un reck dorbi 1961 dat tweetbest Ergevnis an dat eerst Brett.^[10] Insgesamt harr Unzicker 386 Insätze in de bundsdüütsch Natschonalmannschap un is dormit Rekordnatschonalspeler.^[11]

Unzicker hett johrenlang för den Münchener SC 1836 speelt, mit den he in de 1950er un 1960er Johren söben Mal Düütsch Mannschapsmeester wurr. Nah Grünnen vun de veergleisig Bundsliga speel he vun 1974 bit 1976 un in de Saison 1977/78 in de Bundsliga. Nah Grünnen vun de eengleisig Bundsliga speel he mit den Münchener SC 1836 tonächst in de 2. Bundsliga, nah den Upstieg vun 1982 bit 1987 in de 1. Bundsliga. In de Saison 1987/88 speel he mit den TB Erlangen in de 1. Bundsliga, vun 1988 bit 1992 mit den SC 1868 Bamberg un vun 1994 bit 2000 mit den PSV Duisburg. Sien letzt Vereen weer de SK Tarrasch München, mit den he in de Saison 2004/05 in de Böverliga Bayern speel.^[12]

Unzicker weer siet 1963 mit de Aquarellmalerin Freia (* 1938) verheiraadt un hett dree Söhns achterlaaten. En dorvan is de Fackbookschrieven Alexander Unzicker, Söhn Ferdinand (* 1971) is en Jurist mit Doktertitel un Schachspeler (1. un 2. Bundsliga mit Bayern München, hööchste Elo 2337 vun Mai bit Oktober 2013 as ok in’n März 2014). De Söhn Stefan (* 1960) wurr vun Wolfgang Unzicker adopteert.

Över sien fröh Schachkarriere hett he 1962 dat Book Vierzig eigene Partien verfaat. Tosommen mit Jacob Silbermann schreev he 1975 en Geschichte des Schachs.^[13] 1975 hett he dat Lehrbook Knaurs Neues Schachbuch – Für Anfänger und Fortgeschrittene, 1985 Schach für Kenner verfaat.

1994 hett he in’n Updrag vun den Düütschen Schachbund en Rechtsgootachten erstellt^[14], in dat he en Oorheverrecht vun de Speler an de vun hör speelt Partien nich sehn deiht. Dat Gootachten weer notwennig wurrn, wiel Speler as Grootmeester Robert Hübner sück gegen den Regelung stellt harrn, dat Partienotatschonen Eegendom vun den Turnierveranstalter sünd.

1954 kreeg Unzicker dat Sülvern Lorbeerblatt. 1984 wurr he vun de Stadt München mit de Stadt-Medaille uttekent. 1995 kreeg he dat Bundsverdeenstkrüüz an’n Band.

• KARL. Das kulturelle Schachmagazin: Heft 2/2007, Schwerpunkt: Wolfgang Unzicker
• Gerhard Josten (Hrsg.): Wolfgang Unzicker (Anthologie). Verlag ChessCoach, St. Ingbert 2014, ISBN 978-3-944158-03-7.

Wolfgang Unzicker. Mehr Biller, Videos oder Audiodateien to’t Thema gifft dat bi Wikimedia Commons.

• DNB-Katalog
• Wolfgang Unzicker bi chessgames.com (engelsch)
• Biller un Partien
• Utführlich Nahroop bi Chessbase.de
• Indrag bi 365Chess.com
• Partieformulare un wiedere Materialien över Wolfgang Unzicker

1. ↑ Hartmut Metz: Wolfgang Unzicker wird 80 In: de.chessbase.com. 26. Juni 2005, afropen an’n 23. Oktober 2019.
2. ↑ Das Internationale Turnier 1949 in Heidelberg auf TeleSchach
3. ↑ Willy Iclicki: FIDE Golden book 1924-2002. Euroadria, Slovenia, 2002, S. 74.
4. ↑ Westdeutsche Meisterschaft 1948 in Essen up TeleSchach (Krüüztabell un Partien)
5. ↑ Deutsche Schacheinzelmeisterschaft 1953 in Berlin up TeleSchach (Krüüztabell un Partien)
6. ↑ Deutsche Schacheinzelmeisterschaft 1963 in Bad Pyrmont up TeleSchach (Krüüztabell un Partien)
7. ↑ Deutsche Schacheinzelmeisterschaft 1965 in Bad Aibling up TeleSchach (Krüüztabell un Partien)
8. ↑ Internationale Schiedsrichter für Schachkomposition
9. ↑ Wolfgang Unzicker sien Ergevnisse bi Schacholympiaden up olimpbase.org (engelsch)
10. ↑ Wolfgang Unzicker sien Ergevnisse bi Mannschapseuropameesterschapen up olimpbase.org (engelsch)
11. ↑ Nachruf up Chessbase
12. ↑ Ergebnisse des SK Tarrasch München in der Oberliga Bayern 2004/05 bi den Düütschen Schachbund
13. ↑ ISBN 3-570-01335-9.
14. ↑ Gibt es ein Urheberrecht an Schachpartien? (PDF-Datei; 71 kB), Gutachten vom 22. Januar 1994