Warstood

Wapen/Flagg	Koort
Basisdaten
Bundsland: Neddersassen Landkreis: Cuxhoben Samtgemeen: Hemmoor Gemeen: Hemmoor
Flach:	7,77 km²
Inwahners:
Postleettall:	21745
Vörwahl:	04771
Geograafsche Laag:	Koordinaten:53° 42′ N, 9° 9′ O53° 42′ N, 9° 9′ O

Warstood (hoochdüütsch Warstade) is en Oort in de Gemeen Hemmoor in’n Landkreis Cuxhoben, Neddersassen. De Oort liggt an dat linke Över von de Oost. Bi Warstood höört ok von öllers de Hüüs an de Warstoder Sietwenn mit bi.

Warstood is vondaag mit Basbeek tohoopwussen. Von Butenlüüd warrt Basbeek un Warstood faken all beid to Hemmoor tellt. De Oort hett sik aver liekers en egen Identität wohrt, de von de Lüüd dor as wichtig ansehn un pleegt warrt. Von de hüdige Stadt Hemmoor billt Warstood dat Zentrum.

De Oort liggt op’n Rand von de Loomster Geest hen na de Masch von de Oost. In’n Süden von Warstood flütt de Heeßler Möhlenbeek langs. In’n Noorden flütt dat Water aver över dat Warstoder Slüsenfleet direkt in de Oost af.

De Naveröörd sünd Hemm in’n Noorden, Oosten in’n Noordoosten (op de anner Sied von de Oost), Basbeek in’n Süüdoosten, Wohlenbeek un Heeßel in’n Süüdwesten un Hemmoor un Westersood mit Karkfellen un de Herrlichkeit in’n Noordwesten.

In de Oorkunnen kummt Warstood an’n 1. Mai 1255 toeerst vör, as de Bremer Kark den Teegden in Warstood an dat Klooster Himmelpoorten schenkt hett.

Von 1862 bet 1976 hett de Hemmoor Zement AG bi Warstood un Hemmoor Kried afboot. Dor is de Kriedsee von nableven, de vondaag vör allen bi Dukers temlich populär is. An de Iesenbahn is de Oort 1882 över de Nedderelvbahn von Cuxhoben na Horborg anslaten worrn. Warstood harr bet 1991 en egen Bahnhoff, nu mööt de Warstoders den Bahnhoff in Basbeek bruken.

In’n Eersten Weltkrieg sünd 77 Soldaten ut Warstood fullen oder vermisst un in’n Tweten Weltkrieg 93^[1].

In de Nacht von’n 13. Oktober 1941 is en engelsche Flegerbumm op Warstood afsmeten worrn un hett dat Huus von de Familie Elges drapen, dat denn kumplett twei weer.

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Warstood in’n Kanton Loomst höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Heckthusen in’n Kanton Himmelpoorten.

De Oort hett vör 1859 to de Böörd Loomst in dat Amt Bremervöör tohöört un denn von 1859 bet 1885 to dat Amt Oosten. Na 1885 weer dat in’n Kreis Neehuus. 1932 is dat Deel von’n Kreis Land Hadeln worrn un 1977 von’n Landkreis Cuxhoben.

Warstood hett 1962 tohoop mit Hemm un Heeßel de Samtgemeen Warstood billt, de aver blots bet to’n 1. Juli 1968 Bestand harr, as Warstood Deel von de nee billt Gemeen Hemmoor worrn is.

tohoop mit Swartenhütten, Warstoder Sietwenn, Warstoder Diek un den Bahnhoff

Warstood is evangeelsch-luthersch präägt un billt mit de Christuskark Warstood en egen Kaspel mit 3800 Maten. To dat Kaspel höört blangen Warstood sülvs ok Hemmoor, Hemm un Westersood to. De Kark is 1898 boot worrn, nadem dat al siet 1891 jümmer Goddsdeensten in de School geven hett. Vör 1891 sünd de Lüüd in de Bartelmees-Kark in Loomst na Kark gahn. De Örgel von de Christuskark stammt von Furtwängler & Hammer.

Nadem mit dat Zementwark ok veel kathoolsche Lüüd in de Ümgegend kamen sünd, is 1900 de kathoolsche St.-Ansgar-Kark in Warstood boot worrn. De Kark is siet 2010 Deel von de Karkengemeen Hillig Geist in Stood.

Ans gifft dat ok noch en neeapostoolsche Kark.

• vör 1837: Dohrmann
• 1837–1871: Johann Christian Dierks
• 1871–1912: Peter Hinrich Offermann
• 1912–1923: Wilhelm Hake
• 1923–1933: Johann Postel
• 1933–1944: Adolf Quitmann
• 1945–1946: Johannes Martens
• 1946: Fritz Glameyer
• 1946–1948: Klaus Schlichtmann
• 1948–1949: Adolf Quitmann
• 1949–30. Juni 1968: Helmut Grube

Dat Wapen von Warstood wiest op roden Grund en gollen Wagg un en Slötel. De Eck baven links is von en sülvern Wellenlien aftrennt, de för de Oost steiht.

In Warstood steiht ok en Denkmaal för de Fullenen ut de twee Weltkrieg’.

In Warstood warrt jümmer an dat eerste Wekenenn in’n Advent op’n Raadhuusplatz de Wiehnachtsmarkt von de Gemeen Hemmoor fiert.

De Schützenvereen Warstood is 1887 grünnt worrn. De Schützenvereen Warstood-Herrlichkeit, de 1889 grünnt worrn is, hett sik ut Mangel an Liddmaten un Geld to’n 31. März 2017 sülvs oplööst.

An’n 29. Oktober 1967 hett Warstood en Partnerschop mit Couhé in Frankriek slaten un an’n 5. Juni 1968 mit Swaffham in Grootbritannien. De Partnerschop is en Ringpartnerschop, Swaffham is ok mit Couhé verpartnert. Nadem de Gemeen Hemmoor grünnt worrn is, hett de ne’e Gemeen disse Partnerschoppen övernahmen.

Warstood is Deel von dat Middelzentrum Hemmoor.

De Freewillige Füürwehr Warstood is an’n 14. Dezember 1923 grünnt worrn.

Warstood liggt an de Bundsstraat 73, de in’n Noordwesten na Hemmoor un Kumbarg geiht un in’n Süüdoosten na Basbeek un Heckthusen. In’n Süden krüüzt de Bundsstraat 495 de B 73. De B 495 geiht in’n Noordoosten över de Oostbrügg Oosten na Oosten un Wischhoben un in’n Süüdwesten na Loomst.

En Deelstück von de Oortsdörfohrt an de B 73 is 1965 op veer Sporen utboot worrn.^[11]

De nächste Autobahn is de Autobahn 26 (Afsnidd Stood–Hamborg). De Opfohrt 2 Stood-Süüd liggt so 30 Kilometer in’n Süüdoosten von Warstood an de B 73.

En Bahnhoff an de Nedderelvbahn von Cuxhoben na Hamborg is in Basbeek (Bahnhoff Hemmoor).

En School hett dat in Warstood siet opminnst dat 18. Johrhunnert geven. De eersten Narichten, de op en School henwiest, sünd, dat 1770 Johann Ehler Bäcker as Schoolmeester in Warstood anstellt worrn is un dat 1807 dat ole Schoolhuus verköfft un en neet boot worrn is. De ne’e School weer op’n Gehren in’n Süden von Warstood.

Dat Gymnasium Warstood is 1946 grünnt worrn, as Aflegger von dat Athenaeum Stood.

De DRK-Kita in’n Kastanienweg is 1970 grünnt worrn.

Dicht bi Warstood in’n Noorden von Basbeek liggt dat Swemmbad Hemmoor.

In de Zentrumstraat hett de Volksbank Stood-Cuxhoben en Filiaal.

Dat fleten Water för Warstood kummt von’n Waterverband Wingst. Dat Afwater warrt in dat Klärwark Hemmoor klärt.

Christoph Meiners is 1747 in Warstood boren.

De Schriever Peter Rühmkorf is in Warstood opwussen. De Wehrmacht-Offzeer Servais Cabolet is 1908 in Warstood boren. De plattdüütsche Schrieversche Anna Ahrens hett twölv Johr lang in Warstood as Gemeenswester arbeidt. De Bildhauer Frijo Müller-Belecke hett von 1963 af an lang an dat Gymnasium Warstood arbeidt.

• Elisabeth Rühmkorf: Warstade. Ein Ausflug in die Vergangenheit. Sülvsverlag, 1980
• 750 Jahre Warstade. Ein Bogen von der Vergangenheit zur Gegenwart. Hemmoor 2005

1. ↑ http://www.denkmalprojekt.org/dkm_deutschland/hemmoor-warstade.htm
2. ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 241
3. ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 638
4. ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 133
5. ↑ Franz Heinrich Ungewitter: Neueste Erdbeschreibung und Staatenkunde. 1858, Sied 420
6. ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 148
7. ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 156
8. ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 128
9. ↑ Inwahnertallen op gemeindeverzeichnis.de
10. ↑ ^{a b c} Inwahnertallen op verwaltungsgeschichte.de
11. ↑ Rudolf Lembcke: Kreis Land Hadeln. Geschichte und Gegenwart. Rutgever: Landkreis Land Hadeln. Bookdruckeree Günter Hottendorff, Oterndörp 1976, Sied 154

Warstood. Mehr Biller, Videos oder Audiodateien to’t Thema gifft dat bi Wikimedia Commons.

Öörd in de Gemeen Hemmoor

Basbeek (mit de Möhlenreeg, Sethlerhemm un den Tegelkamp) | Heeßel (mit Wedelsforth, de Pulvermöhl un dat Schuppenfeld) | Hemm | (Oold-)Hemmoor (mit en Deel von Ohrensfluchtermoor) | Westersood (mit Bröckelbeek) | Warstood (mit Swartenhütten)