The Battle of the River Plate

The Battle of the River Plate (op plattdüütsch so veel as „De Slacht op’n Plata-Stroom“; dt. Titel: Panzerschiff Graf Spee) is en britischen Speelfilm över dat düütsche Panzerschipp Admiral Graf Spee, dat to’n Anfang vun’n Tweeten Weltkrieg in’n Middel- un Süüdatlantik Hannelsscheep vun de Allieerten opbröcht hett un denn mit en britisch Gerswader vun Krüüzers de Seeslacht vör den Rio de la Plata utstreden hett.

De Film wiest toeerst, woans de Admiral Graf Spee över de See schippert un annere Scheep versenken deit. De Geschichte geiht los an’n 15. November 1939, as vör de Oostküst vun Afrika de Küstentanker Africa Shell versenkt warrt. Captain Dove gifft luutstark Protest un warrt vun Kaptein Langsdorff mit Respekt behannelt. He snackt veel över Taktik un Strategie mit den Kaptein un dröff sik sogor dat Schipp ankieken. Vun de Altmark warrt denn fangene Offizeeren övernahmen, de op de eersten Scheep föhrt sünd, de versenkt weern. Dove dröpt dorünner olle Bekannte wedder.

As Anfang Dezember in’n Süüdatlantik de Damper Doric Star vun de Spee versenkt warrt, kann se kort vör’t Ünnergahn noch en Funkspröök afsetten, so dat Commodore Harwood, de dat Seggen över en Geswader vun britischen Krüüzers hett, op dat Panzerschipp stött warrt. As sik de Kummanddaten op dat Flaggschipp, den lichten Krüüzer HMS Ajax besnacken doot, vertellt de Commodore sien Kapteins sien Plaan: Dat düütsche Schipp hett dree Mööglichkeiten: se warrt in den Indischen Ozean afdreihn, torüch na Huus schippern oder vörher noch op de veel befohrenen Hannelsrouten an de Oostküst vun Süüdamerika losgahn. För dissen Fall lett he sien Geswader kloormaken, üm de Spee in de See vör den Rio de la Plata to’n Kamp to stellen.

Wohrhaftig löpt de Graf Spee de süüdamerikaansche Küst an, as se wietere twee Schipp versenkt hett. Dor dröpt se an’n 13. Dezember op den britischen Krüüzerverband. Ofschoonst de Spee veel sworere Wapen hebbt, nehmt se den Kamp op, wobi sik dat Geswader opdeelt, üm de Füerkraft vun de Spee to splitten. Bi de Seeslacht kriggt de Exeter düchtig wat af un mutt opletzt afdreihn, as de sworen Geschütten all utfallen sünd. Ok de beiden lütteren Krüüzers Ajax un Achilles dreiht af, vunwegen dat se alleen keen Chance hebbt gegen de Spee.

Man, ok dat düütsche Schipp is mehrmols drapen worrn. Dorbi is ok de Kombüüs drapen worrn, so dat op de spee keen warm Eten mehr utgeven warrn kann. Langsdorff beslutt dorüm, Montevideo in Uruguay antolopen, üm den Schaden utbetern to laten. Dor lett he ok de fangenen Offizeeren free. Captain Dove seggt Langsdorff sien Dank dorför, dat he jem so fair behannelt hett. Nu aver geiht de diplomaatsche Krieg los. Na’t internatschonale Recht dröff en Kriegsschipp blots en korte Tiet in en neutralen Haven blieven, üm sik seekloor to maken. Blifft dat Schipp länger, drauht, dat dat Schipp fastsett un de Mannschap interneert warrt.

De Afsennten vun Frankriek un England sett sik mit den Butenminister vun Uruguay in Verbinnen un versöökt em dorto to bringen, de Spee mööglichst gau wedder ut’n Haven to jagen, üm jem to dwingen wedder uttolopen, vördem de Reparatur fardig is. De düütsche Afsennte dorgegen gifft an, dat de Spee tomindst twee Weken bruukt, üm wedder seekloor to warrn. Opletzt kriegt de Düütschen en Tiet vun blots 72 Stünnen. Commodore Harwood beslutt aver, noch wat to töven, vun wegen dat starkere Scheep dorto kamen schüllt. So snackt sik de Briten opletzt doch för en längere Tiet ut, de de Spee in Montevideo blieven kann. Togliek warrt in Ümloop bröcht, dat en grote britische Flott op’n Weg is. Bito löpt en franzööschen Frachter ut’n Haven ut, so dat de Spee dwungen is, länger to blieven, vun wegen dat en Kriegsschipp eerst 24 Stünnen later utlopen dröff, wenn en Hannelsschipp vun en Gegner ut en neutralen Haven utlopen is.

Vun wegen dat Langsdorff nich weet wo stark de Seemacht is, de sien Schipp blockeert, un dat ok nich eenfach is, de Spee wedder see- un striedkloor to maken, beslutt he en radikalen Plaan. An’n 17. Dezember löpt de Spee op de Reed vör Montevideo. Sien Mannschop lett he dor vun Boord gahn. Korte Tiet later gifft dat mehrere Explosionen – dat Schipp fangt Füer un suppt denn af. So kann dat Panzeschipp nich in de Hand vun’n Gegner fallen. As de Verteller an’t Enn vun’n Film düütlich maakt, hebbt de Briten groten Respekt för Hans Langsdorff. För den Kaptein aver is dat en Fraag vun de Ehr, dat he dat Enn vun sien Schipp nich överleven dröff. So schütt he sik korte Tiet later sülvst dood.

• Handbook vun de kathoolschen Filmkritik: „Ein etwas schönfärbender und in Einzelheiten ungenauer, auffällig fairer englischer Kriegsfilm (...).“^[1]

• Adolf Heinzlmeier un Berndt Schulz: "Dokumentarisch aufgemachte Darstellung (...); ebenso beachtlich wie bedenklich." (Weertung: 2 vun 4 möögliche Steerns = dörsnittlich)^[2]

De Film hett keen Pries wunnen, weer aver 1957 in dree Kategorien (Best britischen Film, Best bvritisch Dreihbook un Best Film vun all’n) vörslahn wesen.

De Filmopnahmen güngen an’n 13. Dezember 1955 los, den 16. Johrsdag vun de Slacht vör den Rio de la Plata. De Binnenopnahmen vun den Film sünd in de Pinewood Studios in England maakt worrn. De Butenopnahmen sünd in’n Atlantik un in de Middellannsche See in de Neeg vun Malta, in twee Havens vun Malta, in Portsmouth, in’n Cromarty Firth in Schottland un in ’n Haven vun Montevideo in Uruguay dreiht worrn. An’n 24. Dezember 1956 hett de Film sien Ooropföhren in Grootbritannien hatt. In Düütschland keem he an’n 5. April 1957 in de Kinos.

Op engelsche Siet hebbt an den Film de HMS Jamaica (Crown-Colony-Klass) as Exeter un de HMS Sheffield as Ajax mitwirkt. De HMS Cumberland hett sik sülvst speelt. Ok de indische Krüüzer INS Delhi hett sik sülvst speelt, de to Anfang vun’n Tweeten Weltkrieg as HMNZS Achilles in’n Deenst vun de neeseelännschen Marine stahn hett.

Patrick Dove, de ehmols de Kaptrein weer vun de Africa Shell, de vun de Graf Spee versenkt worrn is, hett in den Film sülvst en lütte Nevenrull speelt as de Captain vun den opbröchten Damper Streonshall. Vör allen aver weer he as Raatgever för de Szenen mit de britischen Fangenen an Boord vun de Graf Spee dorbi.

1. ↑ 6000 Filme. Kritische Notizen aus den Kinojahren 1945 bis 1958. Handbuch V der katholischen Filmkritik, 3. Oplaag, Verlag Haus Altenberg, Düsseldörp 1963, S. 331
2. ↑ Adolf Heinzlmeier un Berndt Schulz in Lexikon „Filme im Fernsehen“ (utwiete Neeutgaav). Rasch un Röhring, Hamborg 1990, ISBN 3-89136-392-3, S. 632

• The Battle of the River Plate in de Internet Movie Database (engelsch)