Philip Goldson
Philip Stanley Wilberforce Goldson (* 25. Juli 1923 in Belize-Stadt; † 3. Oktober 2001 in New York) weer en Journalist un Politiker ut Brietsch-Honduras/Belize (PUP, HIP, NIP, UDP, NABR).
Leven
[ännern | Bornkood ännern]Goldson is 1923 as Söhn von Florence Matilda, borene Babb, un Peter Edward Goldson in Belize-Stadt boren.[1][2] He weer op de St. Mary’s Primary School.[2] Ofschoonst he keen Sekundärschool besöken kunn, hett he 1939 en Overseas Junior Certificate von de Cambridge University kregen un 1941 en Senior School Certificate.[2][3] Von 1941 bet 1947 hett he as Beamten in de brietsche Verwaltung von de Kolonie Brietsch-Honduras arbeidt.[2] In düsse Tied hett he ok as Journalist anfungen, toeerst bi den Civil Service Chronicle.
An’n 28. April 1954 hett he Hadie Jones freet.[1] De beiden harrn fiev Kinner.[1] Hadie Jones Goldson hett von 1961 bet 1965 in London Juristeree studeert un denn söven Johr lang in Belize-Stadt as Avkatin praktizeert.[4] Se weer de eerste Avkatin in Belize.[4]
Goldson hett 1972 anfungen in London Juristeree to studeren.[2] Siene Fro is 1972 mit de Kinner na New York gahn un hett dor leevt.[4] Goldson is 1974 as Avkaat tolaten worrn un weer Maat von Lincoln’s Inn.[2] He keem 1974 na Belize trügg. Siene Fro is aver in New York bleven.[4] In de Tied, in de siene Fro in New York weer, hett Goldson en sösst Kind mit Emma Boiton kregen.[4] Boiton weer för lange Johren de Fro an de Sied von Goldson.
Von 1978 af an weer Goldson dör en Glaukom blind.[3] Dat hett mit dorto föhrt, dat he sik för de Rechten von Minschen mit Behinnerungen insett hett. He is 1986 Präsident von de Caribbean Association of the Disabled worrn un 1987 Viez-Präsident bi Rehabilitation International.[2]
Politik
[ännern | Bornkood ännern]Goldson hett sik för de Unafhängigkeit von Brietsch-Honduras insett, ünner annern in de Johren 1940 in de „Open Forum“-Bewegung. He weer Journalist för dat Belize Billboard, en polietsch Daagbladd, dat in de Johren 1940 un 1950 in Brietsch-Honduras rutgeven worrn is. He is bet August 1969 bi dat Belize Billboard bleven, as dat Verlagshuus afbrennt un dat Daagbladd instellt worrn is.[4]
He hett sik in de General Workers’ Union (GWU) engascheert un weer ok Generaalsekretär von de GWU.[1] 1950 weer he een von de Mitgrünners von de PUP.[1]
He is 1951 as Afornten in’n Stadtraad von Belize-Stadt wählt worrn.[2] He weer bi de Wahl 1962 wedder Kaneedaat för’n Stadtraad, is aver nich wählt worrn.[5] Von 1974 bet 1980 weer he Afornten in’n Stadtraad, is aver bi de Wahl 1980 nich wedder wählt worrn.[5] Bi de Wahl 1983 kunn he sien Seet trüggwinnen.[5] Bi de Wahl 1986 is he nich wedder antreden.[5]
Goldson is von Oktober 1951 bet August 1952 tohoop mit Leigh Richardson as „Opröhrer“ in Haft kamen, nadem se an’n 17. Juni 1951 in en Artikel in dat Belize Billboard schreven harrn There are two roads to self government (Independence). Evolution and Revolution. We are now trying evolution. („Dat gifft twee Weeg, de na de Sülvsverwaltung (Unafhängigkeit) föhrt. Evolutschoon un Revolutschoon. Wi versöcht dat opstunns mit Evolutschoon.“).[6] Dat is von de brietsche Verwaltung so utleggt worrn, dat Goldson un Richardson as nächsten Schridd en Revolutschoon andrauht.
Bi de eerste Parlamentswahl in Brietsch-Honduras 1954 weer he Kannedaat för de PUP in’n Wahlkreis Belize Süüd un hett de Wahl mit 52,7 % von de Stimmen gegen Herbert Fuller von de NP wunnen.
Dormit weer he von’n 28. April 1954 bet 20. März 1957 Afornten von de Legislativversammlung. He weer in düsse Tied Member for Social Services (Vörlöper von dat Amt as Minister för Soziale Saken). As Member for Social Services hett he 1955 ok en wichtige Rull bi dat Wedderopboon von de Stadt Corozal na Hurrikan Janet speelt.
1956 hett binnen de PUP de Flögel ünner George Cadle Price de Bavenhand kregen un Price hett den Parteivörsitt von Richardson övernahmen. Dorüm sünd en Reeg Maten von’n Richardson/Goldson-Flögel ut de PUP rut un hebbt an’n 4. Oktober 1956 de Honduran Independence Party (HIP) grünnt.
Bi de Wahl 1957 is Goldson in’n Wahlkreis Belize Süüd för de HIP antreden un hett 21,5 % von de Stimmen kregen. Dormit keem he blots op’n drüdden Platz achter Denbigh Jeffery von de PUP un Herbert Fuller von de NP.
Över dat ganze Land rekent harr de HIP 18,3 % von de Stimmen kregen, wat en achtbor Resultaat weer. Dör dat Mehrheitswahlrecht in Brietsch-Honduras kunn de Partei aver nich een Afornten in de Legislativversammlung schicken.
Nadem Leigh Richardson an’n 21. Februar 1958 den Parteivörsitt von de HIP afgeven un na Jamaika tagen is, hett sik de HIP ünner Goldson en poor Maand later in’n Juni 1958 mit de National Party to de National Independence Party (NIP) tohoopslaten. De NIP is 1973 in de United Democratic Party (UDP) opgahn.
Bi de Wahl 1961 is Goldson nich antreden, is aver as beropen Maat Afornten in de Legislativversammlung worrn. Herbert Fuller is as Parteibaas von de NIP aftreden un Goldson is as ne’en Parteibaas wählt worrn, wat he bet 1973 bleven is.
Bi de Wahl 1965 weer Goldson Kannedaat för de NIP in’n Wahlkreis Albert un hett de Wahl mit 55,6 % von de Stimmen gegen Frederick Westby von de PUP wunnen.
Ok bi de Wahlen 1969 (56,7 % von de Stimmen gegen Joseph Gray, PUP), 1974 (59,2 % gegen Gray), 1979 (54,7 % gegen George Dakers, PUP), 1984 (69,1 % gegen Rafael Chavez, PUP) un 1989 (58,1 % gegen Roy Young, PUP) kunn he sik jümmer wedder in’n Wahlkreis Albert dörsetten.
Goldson weer von 1961 bet 1965 un von 1969 bet 1974 (1965 bet 1969 blangen Edwin Morey) de eenzige Vertreder von de Oppositschoon in en Legislativversammlung/Repräsentantenhuus, de anners kumplett von de PUP domineert weren. De Historiker Assad Shoman hett över Goldson schreven, dat he dormit in düsse Tied ganz alleen dat Twee-Partein-System oprecht hollen hett.
In’n November 1991 hett Belize en Gesett (den Maritime Areas Act) verafscheedt, dat Guatemala Rechten in dat Seerebeed in’n Süden von Belize toseggt. Dat Gesett stünn in’n Tosamenhang mit’n Grenzkunflikt twüschen Belize un Guatemala un schull bidregen, den Kunflikt bitoleggen. Dorüm weren PUP un UDP all beid för dat Gesett. Goldson un annere Maten in de UDP weren dormit aver untofreden un wullen Guatemala keen Togeständnisse maken. Dorüm hett Goldson mit annere an’n 1. Dezember 1991 de Patriotic Alliance for Territorial Integrity grünnt, de an’n 27. Januar 1992 in de National Alliance for Belizean Rights (NABR) övergahn is.
Bi de Wahl 1993 is Goldson för de NABR in’n Wahlkreis Albert antreden. De NABR harr en Wahlbündnis mit de UDP slaten, so dat keen Kannedaat för de UDP in’n Wahlkreis Albert an’n Start gahn is. Goldson hett 56,6 % von de Stimmen gegen Roy Young von de PUP haalt un is dormit as eenzigen NABR-Afornten wählt worrn. Bi de Wahl 1998 is Goldson nich wedder antreden.
Dormit weer he von’n 1. März 1965 bet 27. August 1998 Afornten von dat Repräsentantenhuus von Belize.
Goldson is ünner Premierminister Manuel Esquivel 1984 Minister för Lokale Verwaltung un Soziale Saken worrn (in dat Kabinett Esquivel I).[2] He hett an’n 4. Juni 1986 tosätzlich dat Amt as Minister för Arbeid övernahmen.[2] Düsse Ministerposten müss he afgeven, as de UDP na de Wahl 1989 wedder in de Oppositschoon güng.
Nadem in de Wahl 1993 de UDP wedder an de Regeren kamen is, is Goldson in dat Kabinett Esquivel II von 1993 bet 1997 Minister för Immigratschoon, Entwicklung för de Jungen Lüüd un Humanressourcen ween. Dat Themenfeld Immigratschoon müss he in’n Juni 1995 afgeven, as Naklapp to en Skandaal üm Visas, de an Börgers von de Volksrepublik China un de Republik China verköfft worrn sünd. An’n 23. Februar 1997 hett he sien Ministeramt kumplett an Faith Babb afgeven.
Ehren
[ännern | Bornkood ännern]De Flegerhaven von Belize-Stadt, de 1990 apenmaakt hett, heet na em Philip S. W. Goldson International Airport.
An’n 19. September 2001 hett he den Order of Belize kregen un 2008 (na sien Dood) den Order of the National Hero. An’n 31. Dezember 2007 is op’n Market Square an de Albert Street in Belize-Stadt en Büst von Goldson opstellt worrn.[7]
An’n 21. September 2012 hett de Northern Highway em to Ehren den ne’en Naam Philip Goldson Highway kregen.
Footnoten
[ännern | Bornkood ännern]- ↑ a b c d e Ann-Marie Williams: Goldson receives Order of Belize tonight, Channel 5 Belize an’n 18. Oktober 2001
- ↑ a b c d e f g h i j Embracing History: Philip S. W. Goldson, Northern Star an’n 9. Februar 2012, Sied 16f
- ↑ a b Belizean Biographies, bnlsis.org
- ↑ a b c d e f Evan X Hyde: From the Publisher, Amandala an’n 14. Januar 2010
- ↑ a b c d Myrtle Palacio: Belize City Council Election Results 1962 to 2003
- ↑ Belize Facts and Figures: Leigh Richardson, Belizeinfocenter.org
- ↑ Bust of Super Patriot Phillip Goldson Unveiled in Downtown Belize City, 7 News Belize an’n 31. Dezember 2007