Good Bookholt

Dat Good Bookholt (hoochdüütsch Gut Buchholz) weer en Eddelgood in dat Dörp Bookholt (vondaag in de Gemeen Visselhöövd in’n Landkreis Rodenborg, Neddersassen).

Dat Good Bookholt hett fröher de Familie von Schlepegrell tohöört. Dat Goodshuus, en Fackwarkhuus mit twee Etaaschen, is in dat 17. Johrhunnert boot worrn. 1820 is de Mannslien utstorven un dat Good is an en Grootdochter gahn, de mit en Major von Reiche verheiraadt weer. Bi de Familie von Reiche is dat Good bet 1891 bleven. In dat Johr hett Maximilian von de Kedenborg dat Good köfft. He hett dat Good aver blots en poor Johr behollen un hett dat denn an de Buurn von Bookholt verköfft. En Rest von dat Good mit 80 Morgen Land is 1908 an Diedrich Bremer verköfft worrn. Dat Goodshuus weer so brockfällig, dat dat afreten worrn is.

De Oort hett vör 1885 to de Amtsvaagdie Visselhöövd in dat Amt Rodenborg tohöört. Na 1885 weer dat in’n Kreis Rodenborg.

Dat Good leeg fröher in de Buurschop Bookholt, weer aver nich Deel von en Gemeen; as Eddelgood weer dat exemt. Eerst later is dat Good denn Deel von de Gemeen Bookholt worrn.

Dat Good is evangeelsch-luthersch präägt un höört to dat Kaspel von de Johannis-Kark in Visselhöövd.

1. ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 154

De Artikel „Good Bookholt“ is een exklusiven Artikel up de Plattdüütsche Wikiepdia. In anner Spraakuutgaven is de nich to finnen.