Flagg vun Liberia

De Flagg vun Liberia wurr an‘ 26. Juli 1847 as Natschonalflagg inführt. De liberiaansch Flagg weiht up etwa 1600 Scheep weltwiet as Billigflagg. De Innahmen för dat Registreeren vun disse Scheep billen en wichtigen Deel vun den liberiaanschen Staatshuushollen.

Offizieller Flaggendag in Liberia is de 26. August.

De liberiaansch Flagg besteiht ut söss root un fiev witt waagerechten Striepen. Doröver liggt in de linke bövere Ecke (Gösch) en quadraatsch, fiev Striepen hooch blau Feld, in dat sück zentraal en fievzackig witt Steern befinnen deiht. De Steern wurrd in dat Flaggengesett blots as „groot“ beteekent, ahn en nipp un nau Grött antogeven.

De elf Striepen söllt de elf Lüüd symobliseeren, de de liberiaansch Unafhängigkeitsverkloren ünnerschreeven hemm. De root Farv steiht för Moot, de witt för moralische Stärke. De witt Steern sall de torüchwunnen Freeheit vun de ehmalge Slaven, dat blau Quadrat dat amerikaansch Heimatland un dokumenteert, dat dat bi Staatsgrünnen blots en eenzige unafhängige Natschoon in Swaartafrika geev.

De Flagg vun Liberia ähnelt stark de Flagg vun de USA. Grund dorför sünd de historsch Verbinnen to de Vereenigt Staaten. Liberia wurr vun de Amerikanern as nee Heimat för free laaten Slaven grünnd, de hier ansiedelt wurrn. Tonächst weer dat Land amerikaansch Kolonie un führ af 1827 en eegen Flagg.

In hör oorsprünglich Form enthull de Flagg vun Liberia anstäe vun en Steern en Krüüz un harr as dat amerikaansch Vörbild 13 Stripen. Disse Flagg wurr ok vun Scheep vun de Kolonie bruukt. As 1845 een vun disse Scheep dör de Briten beslagnahmt wurr, wiel de de Flagg nich anerkennen dee, hett man sück dorför entscheedt, de Kolonie in de Unafhängigkeit to entlaaten, um disse Flagg internatschonale Geltung to geeven. De Unafhängigkeit is an‘ 26. Juli 1847 in Kraft treeden. Mit hör kreeg ok de Natschonalflagg hör hüüdig Utsehn. De Flagg wurr vun en ut söben Fruen bestahn Komitee entworfen un herstellt.

1906 wurr över en düütlich Verännern vun de Flagg nahdacht, Farv un Anordnen vun de Striepen sullen ännert wurrn, ok de Achtergrundfarv vun den Steern stunn in de Diskussion, man hett dat aber denn doch nich maakt.^[1]

De Countys vun Liberia hemm all eegen Flaggen mit düchtig ünnerscheedlich Utsehn. All hemm aber de liberiaansch Natschonalflagg in de Gösch vun de jewielig Flagg.

• Whitney Smith, Ottfried Neubecker: Wappen und Flaggen aller Nationen. Battenberg, München 1980, ISBN 3-87045-183-1.

Flaggen vun Liberia. Mehr Biller, Videos oder Audiodateien to’t Thema gifft dat bi Wikimedia Commons.

• Flags of the World - Liberia (engelsch)

1. ↑ New York Publik Library Archive: [1], engelsch, The flag of Liberia van‘ 25. Juni 2010, afropen an‘ 9. Februar 2011 (Kommentar) Zitat: Source: Liberia by Sir Harry Johnston; with an appendix on the flora of Liberia by Dr. Otto Stapf ; 28 coloured illustrations by Sir Harry Johnston, 24 botanical drawings by Miss Matilda Smith, 402 black and white illustrations from the author's drawings and from photographs by the author and others, 22 maps by Mr. J. W. Addison, Capt. H. D. Pearson, R. E., Lieut. E. W. Cox, R. E., and the author. / Liberia, volume 1. Source Description: 2 v. : ill. (incl. ports., maps), 28 col. pl. (incl. fronts., port.), 4 folded maps ; 25 cm. Location: Schomburg Center for Research in Black Culture / General Research and Reference Division Catalog Call Number: Sc 916.66-J (Johnston, H. Liberia) Digital ID:1112118 Record ID: 55493