Eenheitsgemeen

Eenheitsgemeen (hoochdüütsch Einheitsgemeinde) is en Utdruck för en bestimmten Typ von Gemeen in Düütschland, Öösterriek un de Swiez. Wat genau de Utdruck bedüden deit, is in de verscheden Staten un in Düütschland in de verscheden Bundslänner verscheden.

In de Bundslänner Neddersassen, Sleswig-Holsteen, Döringen, Mekelborg-Vörpommern, Brannenborg un Baden-Württembarg is de Udruck Eenheitsgemeen keen amtlich defineerten Utdruck. De Utdruck warrt in de Regel so bruukt, dat dor de Gemenen mit meent sünd, de all Opgaven von en Gemeen sülvs övernehmt un keen von disse Opgaven an en Verband afgeven hebbt, in den sik mehr Gemenen tohoopslaten hebbt.

In Neddersassen heet de Gemeenverbänn Samtgemeen. Dat gifft 286 Gemenen, de to keen Samtgemeen höört (Stand 1. Januar 2012).

In Sleswig-Holsteen heet de Gemeenverbänn Amt. Dat gifft 80 Gemenen, de to keen Amt höört (Stand 1. Januar 2012).

In Döringen heet de Gemeenverbänn Verwaltungsgemeenschop. Dat gifft 157 Gemenen, de to keen Verwaltungsgemeenschop höört (Stand 1. Januar 2012).

In Mekelborg-Vörpommern heet de Gemeenverbänn Amt. Dat gifft 40 Gemenen, de to keen Amt höört (Stand 1. Januar 2012).

In Brannenborg heet de Gemeenverbänn Amt. Dat gifft 148 Gemenen, de to keen Amt höört (Stand 1. Januar 2012).

In Baden-Württembarg heet de Gemeenverbänn Gemeenverwaltungsverband. Dat gifft 190 Gemenen, de to keen Gemeenverwaltungsverband höört (Stand 1. Januar 2012).

In Noordrhien-Westfalen gifft dat keen Gemeenverbänn, all 396 Gemenen övernehmt de sülven Opgaven. De Utdruck Eenheitsgemeen warrt dorüm meist nich bruukt.

De Bundslänner Berlin un Hamborg bestaht ut blots een Gemeen, de in dissen Sinn en Eenheitsgemeen is. Bremen besteiht ut twee Gemenen, de all beid grote Städer sünd. De Utdruck Eenheitsgemeen warrt in de dree Stadtstaten dorüm meist nich bruukt.

In Bayern is Eenheitsgemeen de amtliche Utdruck för Gemenen, de nich Deel von en Verwaltungsgemeenschop sünd. Dat gifft 992 Eenheitsgemenen in Bayern (Stand 1. Januar 2012).

In Sassen is Eenheitsgemeen de amtliche Utdruck för Gemenen, de nich Deel von en Verwaltungsgemeenschop sünd. Dat gifft 234 Eenheitsgemenen in Sassen (Stand 1. Januar 2012).

In Sassen-Anholt is Eenheitsgemeen de amtliche Utdruck för Gemenen, de nich Deel von en Verwaltungsgemeenschop oder von en Verbandsgemeen sünd. Dat gifft 103 Eenheitsgemenen in Sassen-Anholt (Stand 1. Januar 2012).

In Hessen un in dat Saarland warrt de amtliche Utdruck Grootgemeen bruukt. De 426 Gemenen in Hessen un de 52 Gemenen in dat Saarland sünd all Grootgemenen, Gemeenverbänn gifft dat nich.

In Rhienland-Palz warrt en Gemeen, de all Opgaven sülvs erledigt, amtlich Verbandsfre’e Gemeen nöömt. De Utdruck Eenheitsgemeen warrt dor nich för bruukt. Dat gifft 48 Verbandsfre’e Gemenen in Rhienland-Palz (Stand 1. Januar 2012).

In Öösterriek bedüüdt de Utdruck Eenheitsgemeen, dat na de Verfaten all Gemenen, unafhängig von Grött un Weertschopskraft, de sülven Rechten un Plichten hebbt.

En Utnahm von dissen Grundsatz von de Eenheitsgemenen billt de Städer mit egen Statut. En Stadt, de mehr as 20.000 Inwahners hett, kann op Andrag dör en Landsgesett en besünner Stadtrecht kriegen, dat speziell för de Stadt gellt.

De Swiez kennt en ganz Reeg spezielle Formen von Gemeen, de för besünnere Opgaven dor sünd. Dree wichtige Typen sünd to’n Bispeel de Inwahnergemeen, de Börgergemeen un de Schoolgemeen. De Eenheitsgemeen is dor nu en Gemeen, de all Opgaven von de speziellen Gemenen övernimmt, wenn dat op ehr Rebeed keen Spezialgemenen mehr gifft (Karkengemenen sünd dorbi utnahmen). Dat heet, dat all kommunale Opgaven von een enkelte Behöörd daan warrt. De Regeln sünd dorbi aver von Kanton to Kanton verscheden.