Bornbarg

Wapen/Flagg	Koort
Basisdaten
Bundsland: Neddersassen Landkreis: Cuxhoben Samtgemeen: Hemmoor Gemeen: Heckthusen
Flach:	1,75 km²
Inwahners:
Postleettall:	21755
Vörwahl:	04774
Geograafsche Laag:	Koordinaten:53° 39′ N, 9° 12′ O53° 39′ N, 9° 12′ O

Bornbarg is en Dörp in de Gemeen Heckthusen. Dat liggt in’n Landkreis Cuxhoben in Neddersassen.

Bornbarg liggt an’n Ihlbeker Kanaal, de in’n Süüdwesten mit dat Basbeker Slüsenfleet verbunnen is.

Bornbarg liggt twischen Heckthusen in’n Süüdoosten un Basbeek in’n Noordwesten. Na Noorden un Oosten to sparrt de Oost den Oort af, de bi dree Kilometer vun Bornbarg af liggt. In’n Noorden liggt ok de lüttjere Oort An’n Kanal. In’n Süden liggt Klint, in’n Süüdwesten Lohmöhlen un Ihlbeek un de lüttjere Oort An’n Moor.

In Bornbarg steiht en Kriegerdenkmaal för dat Gedenken an de 15 Lüüd, de in’n Eersten Weltkrieg, un de 22 Lüüd, de in’n Tweten Weltkrieg fullen sünd.

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Klint in’n Kanton Loomst höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Heckthusen in’n Kanton Himmelpoorten.

De Oort hett vör 1850 to dat Gericht Heckthusen höört. 1850 is dat denn Deel von dat Amt Himmelpoorten worrn, dor aver man twee Johr bleven un is 1852 an dat Amt Oosten kamen. 1885 is dat Amt Oosten in’n Kreis Neehuus opgahn. 1932 is de Oort an’n Landkreis Land Hadeln kamen un 1977 Deel von’n Landkreis Cuxhoben worrn.

Bornbarg keem 1962 to de Samtgemeen an de Oost. Disse Samtgemeen is 1972 de Gemeen Heckthusen worrn. Sietdem ist Bornbarg as Gemeen nich mehr sülvstännig.

Bornbarg is evangeelsch-luthersch präägt un höört to dat Kaspel von de Marienkark in Heckthusen.

För de Kathoolschen is de St.-Nikolaus-Kapell in Heckthusen tostännig, de siet 1. September 2010 to de Karkengemeen Hillig Geist in Stood tohöört.

Dat Wapen wiest en Born op en lüttjen Barg un schall den Naam vun dat Dörp bildlich dorstellen.

• 1965–1972: Adolf von Borstel

Bornbarg hett en Schüttenvereen, de 1900 grünnt worrn is. Den gifft dat ok den Sportvereen Bornbarg un den Riedvereen Heckthusen, de in Bornbarg sien Sitt hett.

As freewillige Füürwehr is de Füürwehr Heckthusen för Bornbarg mit tostännig.

Dör Bornbarg löppt de Bundsstraat 73 merrn dör. De Lüüd vun Bornbarg harrn sik dor lang för insett, dat dat Dörp as slaten Oort gellen schull, dat de Autos dor nich ganz so gau dörpesen deen. 2007 weer dat sowiet. An’n 24. August 2007 hebbt se de ne’en gelen Oortsschiller opstellt. Un dor steiht nu blangen dat hoochdüütsche Bornberg ok de plattdüütsche Naam Bornbarg mit bi.

Fröher hett de B 73 in Bornbarg en scharpe Kurve maakt. Dat de Verkehr stüttiger fleten kann, hebbt se dorüm 1960 dat Gasthuus Freudenthal (vondaag Zur Linde) afreten un en Stück wieder weg wedder nee boot, so dat de Kurve en grötteren Radius kriegen kunn. Disse Boarbeiden weren 1962 trech.^[9]

Ok de Nedderelvbahn geiht dör Bornbarg, man de Oort hett keen egen Bahnhoff. De Bahnhoff, de opneegst liggt, is de Bahnhoff Heckthusen. Blangen de B 73 gaht noch lüttjere Straten vun Bornbarg na Ihlbeek, Lohmöhlen, Klint un na de Oost to, na Löhbarg un Lüttwöörn.

De Kinners ut Bornbarg gaht na de Grundschool Heckthusen. Later köönt se op de Oberschool Loomst wesseln oder alternativ op de Haupt- un Realschool Hemmoor. Op Gymnasium gaht se na dat Gymnasium Warstood.

1. ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 31
2. ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 76
3. ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 150
4. ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 146
5. ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 155
6. ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 126
7. ↑ Inwahnertallen op gemeindeverzeichnis.de
8. ↑ ^{a b c} Inwahnertallen op verwaltungsgeschichte.de
9. ↑ Rudolf Lembcke: Kreis Land Hadeln. Geschichte und Gegenwart. Rutgever: Landkreis Land Hadeln. Bookdruckeree Günter Hottendorff, Oterndörp 1976, Sied 153

Bornbarg. Mehr Biller, Videos oder Audiodateien to’t Thema gifft dat bi Wikimedia Commons.