Universität Bremen

Vörlöper vun de Universität Bremen is de „Latienschool vun Bremen“, de 1584 den Naam „Gymnasium Academicum“ kregen hett. In dat Johr 1610 is düt Gymnasium ümwannelt wurrn in dat „Gymnasium Illustre“. Dat weer een Hoochschool mit de veer klassisch Fakultäten Theologie, Juristeree, Medizin un Philosophie. Düsse Hoochschool geev dat bit in dat Johr 1810, as Napoleon ehr uplööst hett.

Nah den 2. Weltkrieg wurr in Bremen öber een nee Universität snackt. 1948 wurr seggt, de schull „International Universität vun Bremen“ heten. In de 1960er Johren güng dat mit dat Grünnen vöran. De eerste Rekter in düsse Tiet weer de Theologieperfesser Otto Weber ut Göttingen. Man toeerst mal geev dat allerhand Striet un de Koalition in Bremen mank SPD un FDP breek vunwegen düssen Striet ut'neen. Ok üm dat Booland geev dat een Schandool. De Uni scholl afsluuts een „Reformuniversität“ weern. Nee Visionen vun de Lehr an de Hoochscholen schollen dor Würklichkeit weern. Amenn stünn een Universität, de in ganz Düütschland as „Lunke Kadersmeed“ bekeken wurr. Mit dat Studeeren güng dat to'n Wintersemester 1971/1972 los. 1973 is de Pädagogisch Hoochschool dor mit tokamen. Dorüm weer dat Utbillen vun Schoolmeesters in düsse Tiet meist de wichtigst Upgaav vun de Uni.

In de lesten Johren hett sik de Universität Bremen verwannelt vun dat Experiment vun de Reformuniversität hen nah een modern Universität, so, as de allerwegens Bestand hebben konn. De Stifterverband för de düütsche Wetenschop hett Bremen in dat Johr 2005 to de „Stadt vun de Wetenschop“ köört un in dat Johr 2006 wurr de Uni Bremen uttekent vunwegen ehr „Öberleggen, woans dat mit de Topp-Forschung an de düütschen Universitäten vörangahn schull“.

Hüdigendags kann een an de Uni Bremen meist all grötter Wetenschoppen studeeren. Man Medizin, Architektuur un Theologie weert in Bremen nich lehrt. De Universität is in twolf Ünnerdelen (Fakultäten) updeelt:

• Ünnerdeel 01: Physik/Elektrotechnik
• Ünnerdeel 02: Biologie/Chemie
• Ünnerdeel 03: Mathematik/Informatik
• Ünnerdeel 04: Produkschoonstechnik
• Ünnerdeel 05: Eerdwetenschoppen
• Ünnerdeel 06: Rechtswetenschop
• Ünnerdeel 07: Weerdschopswetenschop
• Ünnerdeel 08: Sozialwetenschop
• Ünnerdeel 09: Kulturwetenschop
• Ünnerdeel 10: Sprach- un Literaturwetenschoppen
• Ünnerdeel 11: Human- un Gesundheitswetenschoppen
• Ünnerdeel 12: Optucht- un Bildungswetenschoppen