Twielenfleet

Twielenfleet liggt in de Masch von de Ünnerelv in de eerste Miel von Oolland. In’n Oosten liggt de Insel Lühsand.

De Naveröörd sünd Hullern in’n Süden, Speersoort in’n Westen un Wöhrn un Bassenfleet in’n Noordwesten. Op dat annere Över von de Elv in Sleswig-Holsteen doot de Öörd Haseldörp un Heteln liggen.

Twielenfleet kummt 1059 toeerst in de Oorkunnen vör.

In’n Eersten Weltkrieg sünd 47 Soldaten ut Twielenfleet fullen oder vermisst un in’n Tweten Weltkrieg 102.^[1]

In de Franzosentied hett de Oort toeerst 1810 bet 1811 binnen dat Königriek Westfalen de Mairie Twielenfleet in’n Kanton Steenkark billt un hett denn von 1811 bet 1814 to dat Franzöösche Kaiserriek ünner Napoleon un dor to een Deel to de Mairie Hullern-Twielenfleet un to’n annern Deel to de Mairie Steenkark höört. De beiden Mairien legen all beid in’n Kanton Jörk.

De Oort hett vör 1852 to dat Grevengericht Oolland tohöört un denn von 1852 bet 1885 to dat Amt Jörk. Na 1885 weer dat in’n Kreis Jörk. 1932 is dat Deel von’n Kreis Stood worrn.

De Oort is 1966 dör dat Gesett över dat Tohoopsluten von de Gemenen Hullern un Twielenfleet in’n Landkreis Stood Deel von de nu gröttere Gemeen Hullern worrn, de sik an’n 1. Juli 1984 den ne’en Naam Hullern-Twielenfleet geven hett.

Twielenfleet is evangeelsch-luthersch präägt un billt mit de Marienkark en egen Kaspel.

En Denkmaal för de Fullenen ut de twee Weltkrieg’ steiht op’n Karkhoff.

In’n Oort steiht ok en ole Windmöhl, de Venti Amica.

Twielenfleet billt een von dree Oortswehrgruppen binnen de freewillige Füürwehr Hullern-Twielenfleet, de 1891 grünnt worrn is. De Schüttenvereen Hullern-Twielenfleet is 1966 grünnt worrn.

 

 

De ole Lüchttoorn von Twielenfleet is 1893 boot worrn. He is lopen, bet he an’n 12. Oktober 1984 ut Bedriev gahn is un en ne’eren Nafolger kregen hett.

Dör Twielenfleet löppt de Kreisstraat 34, de in’n Noordwesten dör Bassenfleet geiht un in’n Süden na Hullern an de Landsstraat 140 ran.

De nächste Autobahn is de Autobahn 26 (Afsnidd Stood–Hamborg). De Opfohrt 3 Stood-Oost liggt so acht Kilometer in’n Süüdwesten von Twielenfleet.

De nächste Bahnhoff is so bi acht Kilometer wied weg in’n Westen de Bahnhoff Stood an de Nedderelvbahn.

Na Grundschool gaht de Kinner vondaag op de School in Hullern.

De Volksschool von Twielenfleet hett 1969 dichtmaakt. De Kinnergoorn, de an’n 15. Januar 1969 in dat Gemeenhuus von de Karkengemeen Twielenfleet grünnt worrn is, is 1971 in de ole School ümtagen, de 1988/1989 un 2002 twee Maal utboot worrn is.^[8]

Dicht bi de Elv steiht dat Freebad Twielenfleet. In’n Noordwesten na Bassenfleet hen hett de Oort ok noch en Strand an de Elv.

• Hans Peter Siemens: Twielenfleth: 1059–1959. 1959

1. ↑ http://www.denkmalprojekt.org/dkm_deutschland/hollern-twielenfleth2_ns.htm
2. ↑ Christoph B. Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. 1791, Sied 231: https://books.google.de/books?id=jN5QAAAAcAAJ&pg=PA231
3. ↑ C. H. Jansen: Statistisches Handbuch des Königreichs Hannover. 1824, Sied 606: http://books.google.de/books?id=tG0AAAAAcAAJ&pg=PA606
4. ↑ Friedrich W. Harseim, C. Schlüter: Statistisches Handbuch für das Königreich Hannover. 1848, Sied 143: http://books.google.de/books?id=eOI-AAAAcAAJ&pg=PA143
5. ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 139: https://books.google.de/books?id=qTZDAQAAMAAJ&pg=RA2-PA139
6. ↑ http://www.gemeindeverzeichnis.de/gem1900/gem1900.htm?hannover/jork.htm
7. ↑ ^{a b c} http://www.verwaltungsgeschichte.de/stade.html
8. ↑ Sabine Lohmann: Kindergarten in Hollern-Twielenfleth wird 50 Jahre alt, Stader Tageblatt an’n 10. September 2019