Tadel

De Tadel liggt an’n Westrand von de Lümbörger Heid. Dat Water ut dat Rebeed flütt över Gravens na de Lehrde hen af. Dat Land in’n Noorden von’n Oort is deelwies Moor un dat gifft ümto veel Holt.

De Naveröörd sünd Dreeßel in’n Noorden, Jeddingen in’n Noordoosten, Wehnsen in’n Oosten, Stellich in’n Süüdoosten, Bleckwedel, de Königshoff un Lehrden in’n Süden, Egenbossel in’n Süüdwesten, Sankt Pauli un Schepinkel in’n Westen un Odeweg in’n Noordwesten.

De eenstellige Hoff Tadel kummt 1437 toeerst in de Oorkunnen vör. Later is de Hoff opdeelt worrn. In dat 19. Johrhunnert weer de Familie Norden Besitter von’n enen Hoff, de em 1865 an Johann Wilkens verköfft hett. De Hoff warrt ok vondaag noch von de Familie Wilkens bedreven, de em as Feernhoff herricht hett un Forstweertschop bedrifft.

De twete Hoff höört siet 1982 de Familie de Groot to. De Familie bewirtschaft 350 Hektar un bedrifft Melkweertschop. 2013 hett de Bedriev en ne’en Boxenloopstall mit 586 Plätz boot. De liggt aver ut borechtliche Grünn nich mehr op’n Stammhoff, man in’t Butenrebeed twüschen Bleckwedel un Jeddingen.^[1]

In de Franzosentied von 1810 bet 1814 hett de Oort to de Mairie Stellich in’n Kanton Wasra höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Amtsvaagdie Visselhöövd in dat Amt Rodenborg tohöört. Na 1885 weer dat in’n Kreis Rodenborg, de 1977 mit’n Kreis Bremervöör to’n ne’en un grötteren Kreis Rodenborg tohoopleggt worrn is.

Al siet dat 19. Johrhunnert hett de Oort to de Buurschop Bleckwedel un later to de Gemeen Bleckwedel tohöört. De Gemeen Bleckwedel is an’n 1. März 1974 mit de Gemeenreform in Neddersassen Deel von de Gemeen Visselhöövd worrn un billt dor nu en polietsche Oortschop mit egen Oortsvörsteiher.

Tadel is evangeelsch-luthersch präägt un höört to dat Kaspel von de Johannis-Kark in Visselhöövd.

För de Kathoolschen weer von 1852 bet 1960 de Kapell op Slott Kedenborg tostännig. Nu is de Hart-Jesu-Kark in Visselhöövd tostännig, de siet 1. August 2004 to de Karkengemeen St. Maria von’n hilligen Rosenkranz in Wasra tohöört.

För’n Tadel is de freewillige Füürwehr Jeddingen mit tostännig.

An’n Tadel langs löppt de Landsstraat 171, de in’n Noordoosten över Jeddingen na Visselhöövd an de Bundsstraat 440 un an Neenkerken geiht un in’n Süüdwesten över Lüttjen Heinz na Kerklinneln un Veern. In’n Süden löppt de lüttje Bleckwedeler Straat na Bleckwedel. De hüdige L 171 is 1860 boot worrn.

De nächste Autobahn is de Autobahn 27 (Afsnidd Bremen–Wasra). De Opfohrt 26 Veern-Oost liggt so 14 Kilometer in’n Westen von’n Tadel an de L 171.

De nächste Bahnhoff is so bi söss Kilometer wied weg in’n Noordoosten de Bahnhoff Visselhöövd an de Bahnlien Ülzen–Langwedel. Düsse Bahnlien löppt ok direkt an’n Süüdrand von’n Oort vörbi un is 1873 trech worrn.

1. ↑ Viel Komfort für 586 Milchkühe, Rotenburger Rundschau an’n 15. Februar 2013
2. ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 226
3. ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 115
4. ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 594
5. ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 153
6. ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 167
7. ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 178
8. ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 150