Pasqual Maragall

Pasqual Maragall i Mira (* 13. Januar 1941 in Barcelona) is en katalaanschen Politiker.

Maragall hett Recht un Weertschop an de Universität Barcelona studeert un denn 1965 anfungen bi de Stadt Barcelona to arbeiden. 1971 bet 1973 hett he in New York leevt, hett dor de Ne’e School besöcht un dor en Afsluss in Weertschop maakt. 1978 hett he an de Autonome Universität Barcelona sien Dokter maakt.

He hett denn bi de Gewerkschaft arbeidt un keem so to de Partei vun de Sozialisten in Katalonien. Bi de eersten Kommunalwahlen na Franco sien Dood 1979 keem he in’n Stadtraat vun Barcelona. 1982 güng Börgermeester Narcís Serra as Minister för Verdedigen na Madrid un Maragall övernehm dat Börgermeester-Amt. In de Wahlen 1983, 1987, 1991 un 1995 hebbt se em denn jümmer wedderwählt. In disse Tiet harrn se ok de Olympschen Sommerspelen 1992 na Barcelona haalt. Maragall weer Vörsitter vun dat Organisatschoonskomitee. Vun 1988 bet 1995 weer he ok Afornter in dat Parlament vun Katalonien. 1997 hett he sien Amt as Börgermeester an Joan Clos afgeven. He hett sik ut de Politik en beten trüchtagen un hett Vörlesungen in Rom un New York hollen.

1999 keem he wedder trüch to de Politik un weer de Spitzenkandidat vun de Partei vun de Sozialisten in Katalonien bi de Wahlen to dat katalaansche Parlament. Dat Amt as Präsident vun de Regeren vun Katalonien kunn aver sien Gegener Jordi Pujol winnen un Maragall dee de Oppositschoon anföhren. 2000 is he Baas vun siene Partei worrn. Bi de nächste Parlamentswahl 2003 hett he denn aver ene Koalitschoon ut dree Partein opstellt, mit de Initiativ för Katalonien - Gröne un de Republikaansche Linke vun Katalonien, un is Präsident worrn. De Koalitschoon is denn in’n Mai 2006 aver uteneenbraken. To dat ne’e Autonomiestatut för Katalonien, dat de Republikaansche Linke nich wied noog güng, kunnen se sik nich eens warn. Oktober schull dat Neewahlen geven, doch in’n Juni hett Maragall bekannt geven, dat he nich wedder Präsident warrn wull. Em as Präsident opfolgen dee denn an’n 28. November 2006 José Montilla ut sien egen Partei. 2007 hett Montilla denn ok dat Amt as Baas vun de Partei vun em övernahmen.