Stephen Grover Cleveland

Stephen Grover Cleveland (* 18. März 1837 in Caldwell, New Jersey; † 24. Juni 1908 in Princeton, New Jersey) weer en US-amerikaansch Politiker un de 22. as ok de 24. Präsident vun de USA. He hett dat Amt van’ 4. März 1885 bit 4. März 1889 un van’ 4. März 1989 bis 4. März 1893 utöövt.

Hochtiet vun Präsident Cleveland un Frances Folsom

Cleveland is de eenzig Präsident vun de USA, de sien twee Amtstieden nich upnanner folgen deen. Viezpräsident weer in sien eerste Amtstiet Thomas Andrews Hendricks, in de tweete Adlai Ewing Stevenson. Cleveland weer ok de eenzig direkt wählt Präsident vun de Demokraatsch Partei in en 52 Johr lang, van 1861 bit 1913, düern Ära vun de Dominanz de de Republikaansch Partei (Andrew Johnson weer Demokrat, keem aber blots as nahrücken Viezpräsident för Abraham Lincoln in’t Amt). Cleveland weer tovör Sheriff vun den Erie County, af 1881 Börgermeester vun Buffalo un siet 1882 Gouverneur vun den Staat New York ween.

Leven

Cleveland wuss as Söhn vun en presbyterianischen Pfarrer in bannig autoritär Ümstännen up, de hüm en bannig stark Plichtbewusstween vermitteln deen.^[1]

Bi de Präsidentschapswahl vun 1884 wurr dör en vun Cleveland en in’ Vergliek mit sien republikaansch Vörgänger Chester Alan Arthur düütlich verännert Politik, insbesünnere in Bezug up de sück billen Monopole, verwacht. He sülvst dorgegen hett klor maakt, dat ok en Wessel in de Regeeren de „existeeren Konditschonen“ nich verännern dee.^[2] Eerste Matnahmen gegen Monopole hebbt sück eerst buterhalv de Amtstied vun Cleveland 1890 mit den Sherman Antitrust Act ergeven. Sien överraschend flinken Upstieg to’n Präsidenten hett he sien Roop vun de persönlich Integrität to verdanken, de sien Präsidentschap to en Gegenentwurf vun de tallriek Korruptschoonsskandale vun disse Tiet maken dee, as ok de Ünnerstütten dör Reformer-Krinken vun de Republikaansch Partei.^[3]

He hett de Tall vun de Beamten düchtig utwiet un hett dormit de US-Verwalten effektiver maakt. In de Wertschaps- un Sozialpolitik hett sück Cleveland för den Goldstandard un en wietgahn Torüchhollen vun den Staat tegenöver de Ünnernehmen utspraken. He leet dorgegen de Armee gegen Streiks as to’n Bispeel den Pullman-Laway vörgehn. Allerdings hett he sück ok entgegen den Forderungen vun Ünnernehmen wiegert, de Stüern för riek Börger to senken. In sien eerst Amtstiet wurr 1886 de Freeheitsstatue in New York inweeht. Butenpolitisch hett he sück tegen de plaant Annexion vun Hawaii utspraken. 1888 verlor he der Wedderwahl gegen Benjamin Harrison; 1892 wurr he aber nochmals vun de Demokraten as Kandidat nomineert un kunn disse Wahl gegen sien Nahfolger Harrison ok winnen.

Kört nah den Anträe vun sien tweet Amtstiet muss hüm en krebsordig Geschwür an’ harten Gagel wegnommen wurrn. Man hett dat aber stillkens makt, um dat kien Twiefel an sien Gesundheit un sien Führungskraft upkommen dee.

Sien Wertschapspolitik wurr aber immer unpopulärer, so dat hüm sien Partei nahderhen fallen laaten hett un statt hüm 1896 William Byron Jennings as Präsidentschapskandidaten nomineeren dee.

Cleveland weer de eenzig Präsident, de in dat Witt Huus heiraadt hett. As he 1886, mit 49 Johren, de 21-johrige Frances Folsom heiraten dee, kemm dat to en Schandaal, de 1888 to’n Wahlkampthema wurr. Mit sien Fru harr he fiev Kinner.

Ideologie

Cleveland hett en calvinistisch Vörherbestimmungsideologie vertreden, de de amerikaansch Natschoon en besünner Rull towiesen dee.^[4]

Enkeld Nahwiesen

↑ Robert Kelley: Presbyterianism, Jacksonianism and Grover Cleveland. In: American Quarterly. 18, Nr. 4, 1966, S. 615-636, S. 615.
↑ Howard Zinn: A People’s History of the United States. Harper Perennial, New York 2005, ISBN 0-06-083865-5, S. 258
↑ # White House website biography of Grover Cleveland
↑ Robert Kelley: Presbyterianism, Jacksonianism and Grover Cleveland. In: American Quarterly. 18, Nr. 4, 1966, S. 615-636, S. 615f.

Weblenken

Stephen Grover Cleveland. Mehr Biller, Videos oder Audiodateien to’t Thema gifft dat bi Wikimedia Commons.

Bi’n Wikiborn gifft dat Originalschriften över dat Thema oder vun den Schriever: Wahlkampslager vun Cleveland för de Präsidentschapskandidatur 1888 „Hurrah! hurrah! for Cleve and Steve“.

Bi’n Wikiborn gifft dat Originalschriften över dat Thema oder vun den Schriever: Uproop vun den düütschstämmigen Carl Schurz, Cleveland to wählen.

Präsidenten vun de USA

[1] Robert Kelley: Presbyterianism, Jacksonianism and Grover Cleveland. In: American Quarterly. 18, Nr. 4, 1966, S. 615-636, S. 615.

[z1-2] Howard Zinn: A People’s History of the United States. Harper Perennial, New York 2005, ISBN 0-06-083865-5, S. 258

[3] # White House website biography of Grover Cleveland

[4] Robert Kelley: Presbyterianism, Jacksonianism and Grover Cleveland. In: American Quarterly. 18, Nr. 4, 1966, S. 615-636, S. 615f.

[1]

[2]

[3]

[4]