Manny Albam

Manny Albam, eegentlich Emmanuel Albam (* 24. Juni 1922 in Samaná, Dominikaansch Republik; † 2. Oktober 2001 in Croton-on-Hudson, New York) weer en Jazz-Baritonsaxophonist, Bandleader un Arrangeur.

Albam keem all as Kind nah New York, hett de High School in New York City besöcht un fung 1940 up dat Altsaxophon an, bevör he to dat Bariton wessel. In de 1940er Johren hett he u. a. bi Muggsy Spanier (1941), Bob Chester (1942), Georgie Auld (1942 bit 1945), Boyd Raeburn, Bobby Sherwood, Sam Donahue (1947), Herbie Fields un Charlie Barnet (1948/49) arbeit. He tendeer mehr to’n Swing un Bebop un hett af 1950 as Arrangeur för Big Band-Leader as Count Basie, Stan Kenton oder Woody Herman as ok en groot Tall vun lütt Jazz-Formationen, as vun Terry Gibbs arbeit. In de 1950er Johren nehm he en Rieg vun Alben up; de beid bekannsten weern The Jazz Greats of Our Time, Vol. 1 & 2 mit Nick Travis, Art Farmer, Conte Candoli, Jack Sheldon, Harry Sweets Edison, Charlie Mariano, Bill Holman, Richie Kamuca, Pepper Adams, Gerry Mulligan, Hank Jones, Shelly Manne, de jeweils bi twee Sessions in New York un Los Angeles entstunnen. Upsehn hett he Enn’ vun de 1950er Johren mit sien Album Jazz New York erregt, an dat ok de jung Pianist Bill Evans mitwarkt hett.

In de latere Johren hett Albam sien Aktivitäten up Lehrtätigkeit un Filmmusik verleggt. He hett an de Eastman School of Music ünnerricht.