Helgoland

Helgoland (Helgolanner Noordfreesch: Dät Luun) is ene Noordseeinsel in de Düütsche Bucht rund 50 km vör de Elv- un Wersermünn. Se is 1700 m lang un besteiht ut dat deper gelegene Unnerland un den rund 60 m hogen, roten Buntsandsteenfelsen vun dat Baberland. Oosten vun disse Hööftinsel liggt de Düün mit ehren witten Badestrand. Dar kann’n aver blots mit’n Boot henkamen. Dat Eiland hett 1306 Inwahner (Stand: 31. Dez. 2019) up en Flach vun 4,2 km².

Fröher höör dat Eiland maal to Däänmark. 1807 setten de Briten sik hier fast. Eerst an’n 9. August 1890 keem Helgoland dör den Helgoland-Sansibar-Verdrag an Düütschland.

In beide Weltkriegen woor de Insel to enen See-Stüttpunkt utboot un muss vun ehre Bewahners in’n iersten Weltkrig furts, in tweeten awer irst naa de Totaal-Bombardirung an’n 18. April 1945 rüümt weern. In’n Tweeten Weltkrieg weer dar ene U-Boot-Statschoon, un darum woor de Insel dör Bombenangrepen stark demoleert. Ok na den Krieg druffen de Helgolänners nich foors wedder trüggkamen. De Insel deen de brietsche Air Force as Teelgelänne un so woorn ehr grote Schadens toföögt. Eerst 1952 woor de Insel freegeven, un de 2000 Bewahners kunnen trüggkamen un mit den Wedderupbo anfangen. Vundaag besöökt wedder so as in de Vörkriegstiet jedet Jahr över en Veerdel Milljoon Gäst de Insel.