Hans Stubb

Hans „Hennes“ Stubb (* 8. Oktober 1906; † 19. März 1973) weer en düütsch Footballspeler vun Eintracht Frankfurt.

Stubb hett 10 Lännerspelen för Düütschland maakt un dorbi een Door schaaten. Dat weer ok noch en besünner Door; bi en Lännerspeel gegen de Mannschap ut Ungarn hett he up en natt Rasen ut 60 Meter dat Door drapen un hull dormit lang Tiet den Rekord vun dat Door ut de gröttste Distanz.

Hans Stubb fung sien Footballloopbahn 1920 bi Germania 94 Frankfurt an. Över de Spvgg Ostend 07, för de he 1925 bit 1928 speel, is he 1928 to de Frankforter Eintracht wesselt. För de eerst Mannschap hett he van 1928 bit 1944 in de jewiels hööchstmögelk Speelklass speelt: Bezirksliga Main-Hessen (1928 bit 1933), Gauliga Südwest (1933 bit 1940), Berieksklass Südwest (1940/41), Berieksklass Hessen-Nassau (1941/42), Gauliga Hessen-Nassau (1942 bit 1944). An‘ 12. Juni 1932 speel he in dat Endspeel um de Düütsch Footballmeesterschap in Nürnbarg, dat gegen den FC Bayern München mit 0:2 verloren wurr. Stubb hett dorbi en Handelfmeter veroorsaakt, dör de Bayern in Führung gung.^[1] Stubb keem in 139 Ligaspelen to’n Insatz, in de he negen Doren schaaten hett. Dorneben hett he noch 42 Spelen in de süddüütsche Meesterschap, 18 Pokalspelen un 12 Spelen in de Endrunn to de düütsch Footballmeesterschap maakt. Insgesamt harr he mehr as 500 Insätze för de Eintracht.

Hans Stubb is Ehrenspeelführer bi Eintracht Frankfurt.