Hoow

De Oort liggt op dat rechte Över von de Elv in de Elvmasch von de Veerlannen. Dat Rebeed in’n Noorden is as Naturschuulrebeed Karkwarder Wischen schuult.

De Naveröörd sünd Seefeld in’n Noorden, Karkwarder in’n Oosten, Sand un Hoopt in’n Süüdoosten, Flegenbarg in’n Süüdwesten, Rosenweid in’n Westen un Wraust in’n Noordwesten.

De Oort hett von 1420 bet 1868 to dat Amt Bardörp tohöört. Von 1868 bet 1926 weer de Oort Deel von de Landherrnschop Bardörp un 1926 bet 1938 von de Landherrnschop Hamborg. As Naklapp von dat Groot-Hamborg-Gesett is de Landherrnschop Hamborg oplööst worrn un siet 1. April 1938 höört dat Rebeed nicht blots to dat Land Hamborg, man ok direkt to de Gemeen Hamborg.

Hoow is evangeelsch-luthersch präägt un höört to dat Kaspel von de Severini-Kark Karkwarder.

För de Kathoolschen is de St.-Marien-Kark in Bardörp tostännig.

En Denkmaal för de Fullenen ut de twee Weltkrieg’ steiht in Karkwarder.^[1]

De nächste Autobahn is de Autobahn 25 (Afsnidd Hamborg–Geesthacht). De Opfohrt 5 Bardörp liggt so söven Kilometer in’n Noordoosten von Hoow.

De nächste Bahnhoff is so bi negen Kilometer wied weg in’n Noordoosten de Bahnhoff Bardörp an de Bahnlien Berlin–Hamborg. Op de Hambörger Maschbahn hett dat von 1921 bet 1952 Personenverkehr geven. In düsse Tied harr Hoow en egen Bahnhoff, de knapp een Kilometer in’n Noordoosten buten den Oort leeg.

1. ↑ Onlineprojekt Gefallenendenkmäler

De Artikel „Hoow“ is een exklusiven Artikel up de Plattdüütsche Wikiepdia. In anner Spraakuutgaven is de nich to finnen.