Hössen (Landkreis Horborg)

Hössen liggt in de Masch von de Elv an’n Rand na de Geest an de Seev. In’n Oosten un Süüdoosten von’n Oort liggt dat Naturschuulrebeed Ünner Seevdaal.

De Naveröörd sünd Bullenhuus, Over, Herrendiek, Wuhlenborg un Rosenweid in’n Noordoosten, Achterdiek, Stell un Fachenfelln in’n Süüdoosten, Maschen in’n Süüdwesten, Glüsen in’n Westen un Mäkelfeld, Lütt Moor un Groot Moor in’n Noordwesten.

In’n Eersten Weltkrieg sünd ölven Soldaten ut Hössen fullen oder vermisst un in’n Tweten Weltkrieg 41.^[1]

In de Tied von 1970 bet 1977 is an de Bahnlien Hamborg–Hannover twüschen Maschen un Hössen de Rangeerbahnhoff Maschen anleggt worrn. Dorbi sünd ok de Seen üm Hössen rüm (See in’t grote Moor, Steller See, Junkernfeldsee) anleggt worrn.

In de Franzosentied von 1810 bet 1814 hett de Oort to de Mairie Mäkelfeld in’n Kanton Hittfeld höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Vaagdie Neeland-Over in dat Amt Horborg tohöört. Na 1885 weer dat in’n Kreis Horborg. 1932 is dat Deel von’n ne’en, grötteren Kreis Horborg worrn.

De Oort is an’n 1. Juli 1972 mit de Gemeenreform in Neddersassen Deel von de Gemeen Seevdaal worrn. Binnen de Gemeen Seevdaal billt Hössen nu tohoop mit Maschen un Host en Oortschop mit egen Oortsraad un Oortsbörgermeester.

Hössen is evangeelsch-luthersch präägt un höört to dat Kaspel von de Fredenskark in Maschen. Bevör disse Kark 1952 trech worrn is, hett de Oort to dat Kaspel von de Mauritius-Kark in Hittfeld tohöört.

För de Kathoolschen is de Goden-Hirt-Kark in Winsen tostännig.

Dat Wapen von Hössen wiest baven op gollen Grund en blauen Lööw un ünnen op op swarten Grund mit twee sülvern Striepen en sülvern Fisch.

De Lööw kummt ut dat Wapen von dat Förstendom Lümborg (Bruunswieker Lööw).

In Hössen steiht en Denkmaal för de Fullenen ut de twee Weltkrieg’.

In dat Dörp gifft dat dat Dörpgemeenschopshuus Uns Dörphus.

De freewillige Füürwehr Hössen is an’n 1. April 1936 grünnt worrn. Vörher harr dat siet 12. August 1902 en Plichtfüürwehr geven.

Dör Hössen loopt kene groten Straten. Över den Grönen Damm in’n Noorden kummt een na de Kreisstraat 29, de denn in’n Westen na Mäkelfeld geiht un in’n Noordoosten na Over. De Hössener Straat löppt in’n Süden över de Decatur-Brügg na Maschen.

De nächste Autobahn is de Autobahn 1. Dat gifft aver keen Opfohrt op de A 1 in direkte Neegd. De nächste Opfohrt is dorüm de Opfohrt 2 Maschen op de Autobahn 39. De liggt so veer Kilometer in’n Süüdwesten von Hössen an de K 86/K 10. Över disse Opfohrt kummt een ok op de A 1 un op de A 7.

De nächste Bahnhoff is blots en poor hunnert Meter in’n Süden de Bahnhoff Maschen an de Bahnlien Hamborg–Hannover.

• Werner Steinbauer: Geschichte des Dorfes Hörsten. 2000

1. ↑ http://www.denkmalprojekt.org/dkm_deutschland/hoerstenseevetal.htm
2. ↑ C. B. Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. 1791, Sied 116: https://books.google.de/books?id=jN5QAAAAcAAJ&pg=RA1-PA116
3. ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 60: http://books.google.de/books?id=Q 5OAAAAcAAJ&pg=PA60
4. ↑ C. H. Jansen: Statistisches Handbuch des Königreichs Hannover. 1824, Sied 282: http://books.google.de/books?id=tG0AAAAAcAAJ&pg=PA282
5. ↑ Friedrich W. Harseim, C. Schlüter: Statistisches Handbuch für das Königreich Hannover. 1848, Sied 93: http://books.google.de/books?id=eOI-AAAAcAAJ&pg=PA93
6. ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 129: https://books.google.de/books?id=qTZDAQAAMAAJ&pg=RA2-PA129
7. ↑ http://www.gemeindeverzeichnis.de/gem1900/gem1900.htm?hannover/harburg.htm
8. ↑ ^{a b c} http://www.verwaltungsgeschichte.de/harburg.html

 

Öörd in de Gemeen Seevdaal

Bääkdörp | Bullenhuus | Emmelndörp | Fleest | Glüsen | Groot-Moor | Helmstörp | Hittfeld mit Eddels un Karoxbossel | Holtörp | Host | Hössen | Lütt-Moor | Lindhost | Maschen | Mäkelfeld | Metzendörp mit Wooxdörp | Ohlendörp | Over | Ramßel