Klaus Wedemeier

Klaus Wedemeier (* 12. Januar 1944 in Hof an de Saale) weer vun 1985 bit 1995 Präsident vun den Senat vun de Free Hansestadt Bremen un Bremer Börgermeester.

Ut Hof an de Saale in Bayern is sien Familie 1956 nah Bremen tagen. Dor is he to’n Angestellten bi’n Koopmann utbillt wurrn. Later hett he dat bit to’n Prokuristen vun en Sellschup för dat Boon vun Wohnungen bröcht.

1971 is Wedemeier to’n eersten Mal för de SPD in de Bremer Börgerschup wählt wurrn. 1979 is he Vörsitter vun de Frakschoon vun de SPD in de Börgerschup wurrn. As Hans Koschnick 1985 as Börgermeester vun Bremen Bott geben hett, is Wedemeier em upfolgt.

1987 is he denn to’n eersten Mal as Toppkandidat vun de SPD to de Wahl anträden. Dortieds hett de SPD bloß 0,8 % verloren un de afsoluut Mehrheit vun 50,5 % beholen.

Bi de neegste Wahl 1991 hett de SPD man bloß noch 38,8 % kregen un to’n eersten Mal siet twintig Jahren nich mehr de afsoluut Mehrheit harrt. Wedemeier hett denn en Ampelkoalitschoon upmaakt mit FDP un Bündnis 90/De Grönen. Düsse Koalitschoon is aber in’n Januar 1995 ut’neen braken. De neegsten Wahlen mössen denn vörtrocken weern un bi düsse Wahlen hett de SPD bloß noch 33,4 % vun de Stimmen in Bremen kregen. De CDU is mit 32,6 % to’n eersten Mal dune rankamen. Dor hett Wedemeier Bott geben. Henning Scherf is em denn upfolgt.