Frank Luck

Frank Luck is in Seligenthal upwussen. En Loopbahn as Skilanglöper weer vörherbestimmt, wiel sien Vader, Unkel un Grootvader ok all Langlöper weern. Mit dree Johren stunn Frank Luck eerstmals up Skiern. 1980 is he aber to'n Biathlon wesselt. He weer dorbi so goot, dat he all 1988 för de Olympisch Winterspelen in Calgary nomineert wurr. Sien best Ergevnis dor weer Platz 6 in' Sprint. De Dörbröök gelung hüm dör den Weltmeestertitel in' Sprint in de Saison 1988/89. Frank Luck hörr den ASK Vorwärts Oberhof an un weer somit Liddmaat vun de NVA. Nah 1989 wurr he in de Sportfördergrupp vun de Bundswehr as Sportsuldat övernommen.

Wegen de Kinnerkrankheit Mumps kunn he nich an de Winterspelen 1992 in Albertville deelnehmen. Bi de Olympisch Winterspelen 1994 in Lillehammer wurr he mit de düütsch Biathlonstaffel (gemeensam mit Ricco Groß, Mark Kirchner un Sven Fischer) Olympiasieger. Dissen Erfolg kunn he veer Johr later in Nagano (gemeensam mit Groß, Fischer un Peter Sendel) noch mal schaffen. Luck wunn in sien in sien mehr as 17-johrigen Loopbahn insgesamt ölf Weltmeestertitel, den letzten mit de Staffel bi de Biathlon-Weltmeesterschapen 2004 in sien Heimat Oberhof. Nah dat Rennen hett he ok sien Loopbahn afslooten. Mit wiederen fiev Sülver- un veer Bronzemedaillen is Frank Luck nah Ole Einar Bjørndalen un Raphaël Poirée de spoodriekste WM-Deelnehmer.

Anfang April 2009 hett Frank Luck in en Feernsehinterview bi (Sport Inside, WDR) inrüümt, to DDR-Tieden vun sien Trainer ahn sien Weten de Doping-Substanz Oral-Turinabol kreegen to hemm.

Af de Saison 2004/2005 hett he eenig Tiet bi Eurosport as Biathlon-Co-Kommentator an de Siet vun Sigi Heinrich arbeit.

Frank Luck weer mit Andrea, borene Fischer, de Süster vun den Biathleten Sven Fischer, verheiraadt, mit de he twee Kinner, Kristin un Madlen, hett. To Tiet is he mit de Snowboardweltmeesterin Sandra Farmand tosommen. In' März 2007 kreegen se en Dochter. Luck is en gern in de Natuur, hett all sien Vader to de Jagd begleit un geiht ok sülvst den Jagdsport nah.

Nah sien Sportkarriere nehm Frank Luck en Angebot vun sien ehmalgen Sponsor, de Deutsche Kreditbank (DKB), an, sien bitheriges Hobby Jagdsport to'n Berop to maaken. Enn' 2006 ünnerschreev he en Verdrag, as free Mitarbeiter af 1. April 2007 en Jagdbedriev in den de DKB tohörrn brannenborgsch Slott Liebenberg uptobauen. Siet Enn' 2009 is he Baas vun dissen Jagdbedriev.

• Offiziell Websteed
• Frank Luck in de Datenbank vun de IBU (engelsch)
• Frank Luck in de Datenbank vun sportsreference.com (engelsch)
• DNB-Katalog