Ehrhoorn

De Oort liggt in’t Holt von de Lümbörger Heid un in dat Naturschuulrebeed Lümbörger Heid. Dat Water ut dat Rebeed flütt över de Eest af.

De Naveröörd sünd Wehlen in’n Noorden, Wesel, Tunnhoff, Meenern un Unnel in’n Noordoosten, Wils, Einem un Habenbeck-Nerndörp in’n Süüdoosten, Wulfsbarg in’n Süden, Baal in’n Süüdwesten un Wintemaur an de Chaussee in’n Noordwesten.

Ehrhoorn kummt 1050 toeerst in de Oorkunnen vör.

1942/1943 is twüschen Wintemaur un Ehrhoorn dat Krankenhuus Wintemaur anleggt worrn, dat later de Stadt Hamborg övernahmen hett. Düt Krankenhuus hett 1997 dichtmaakt. Von 1999 bet 2005 sünd de Anlagen denn noch as Pleegzentrum bruukt worrn. Siet 2005 verfallt de Anlagen.

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Wils in’n Kanton Soltau höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Behrn in’n Kanton Garlstörp.

De Oort weer fröher opdeelt. Een enkelten Hoff hett to dat Amt Garz tohöört un de Rest to de Amtsvaagdie Amelkusen in dat Amt Winsen. 1795 hett dat Amt Garz sien Hoff an dat Amt Winsen afgeven.^[1] 1852 is denn de kumplette Oort in dat Amt Soltau wesselt. Na 1885 weer dat in’n Kreis Soltau. 1977 is dat Deel von’n Landkreis Soltau-Fambossel worrn (de siet 2011 Landkreis Heidkreis heet).

De Oort hett fröher en egen Buurschop un Gemeen billt, to de blangen Ehrhoorn sülvs ok de Öörd Einem, Wintemaur an de Chaussee, Habenbeck-Nerndörp un Habenbeck-Bobendörp tohöört hebbt. Düsse Gemeen is an’n 1. März 1974 mit de Gemeenreform in Neddersassen oplööst worrn. Habenbeck-Nerndörp un Habenbeck-Bobendörp sünd Deel von de Gemeen Behrn worrn (de twee Weken later al Deel von de Gemeen Bissen worrn is) un Ehrhoorn, Einem un Wintemaur an de Chaussee kemen an de Gemeen Snevern un billt dor sietdem en Oortschop mit egen Oortsvörsteiher.

Oort:

Gemeen:

Ehrhoorn is evangeelsch-luthersch präägt un höört to dat Kaspel von de Peter-un-Paul-Kark in Snevern. Binnen dat Kaspel höört de Oort to’n Parrbezirk Wintemaur.

För de Kathoolschen is de St.-Ansgar-Kark in Snevern tostännig, de siet 1. November 2006 to de St.-Maria-Karkengemeen in Soltau tohöört. De St.-Ansgar-Kark is 1963 boot un an’n 1. Januar 1964 egenstännige Karkengemeen worrn. Vörher is dat Rebeed ok al von de St.-Maria-Kark in Soltau betreut worrn.

De Doden warrt op’n Karkhoff Wintemaur begraven, de siet 1942 besteiht.

Börgermeesters:

• 1949–1961: Ernst Soltendieck
• 1961–1974: Otto Bleeken

Oortsvörsteihers:

• 1974–1991: Heinrich Weseloh
• 1991–: Karin Meyer

En Denkmaal för de Fullenen ut de twee Weltkrieg’ steiht in Wintemaur op’n Karkhoff.

För Ehrhoorn is de freewillige Füürwehr Ehrhoorn-Wintemaur tostännig, de ehr Sprüttenhuus in Wintemaur an de Chaussee hett. Ehrhoorn un Wintemaur harrn fröher en Löschverband mit Snevern. Düsse Löschverband is 1942 oplööst worrn un in Ehrhoorn/Wintemaur hett sik en egen Verband billt. Offiziell is de Füürwehr Ehrhoorn-Wintemaur denn aver eerst na’n Tweten Weltkrieg an’n 4. Mai 1947 grünnt worrn.

Dör Ehrhoorn löppt de Landsstraat 211, de in’n Noordwesten na Wintemaur an de Chaussee un dor an de Bundsstraat 3 ran geiht un in’n Süüdoosten över Habenbeck un Behrn na Bissen. De B 3 föhrt von Wintemaur in’n Noorden över Will op Bookholt un Buxthu to.

De nächste Autobahn is de Autobahn 7 (Afsnidd Hamborg–Hannover). De Opfohrt 43 Bissen liggt so ölven Kilometer in’n Süüdoosten von Ehrhoorn an de L 211.

De nächste Bahnhoff is so bi veer Kilometer wied weg in’n Noordwesten de Bahnhoff Wintemaur an de Heidbahn.

De Kinner ut Ehrhoorn gaht in Snevern op de Grundschool an’n Oosterwald.

1. ↑ Ernst Spangenberg: Sammlung der Verordnungen und Ausschreiben welche für sämmtliche Provinzen des hannoverschen Staats ergangen sind. 3. Deel (1780-1799), Hahnsche Hoffbookhandlung, Hannover 1821, Sied 765-778
2. ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 64
3. ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 158
4. ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 103
5. ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 92
6. ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 101
7. ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 152
8. ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 103
9. ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 92
10. ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 101
11. ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 152
12. ↑ Inwahnertallen op gemeindeverzeichnis.de
13. ↑ ^{a b c} Inwahnertallen op verwaltungsgeschichte.de