David Farquharson

David Farquharson (* 17. November 1839 in Blairgowrie, Perthshire; † 12. Juli 1907 in Sennen Cove, Cornwall) weer en schottisch Landschopsmaler.

Farquharson leev eerst in sien Heimatstadt, truck dennaber up de Söök nah Updrääg 1872 nah Edinburgh wo he bit 1882 bleev. Dornah gung he nah London un wahn bit 1897 in St John's Wood, en Londoner Künstlerveertel. De restlich Tiet vun sien Leven hett he in en lütten Oort Sennen Cove in Cornwall verbrocht.

Farquharson stell af 1868 in de Royal Scottish Academy ut, un van 1877 bit 1904 ok in de Royal Academy of Arts in London. Sien Landschopsdorstellungen funnen dor groot Beachtung, wat hüm 1904 de Wahl to’n Associate Member of the Royal Academy (ARA) inbrocht hett. Farquharson sien Biller wiesen völ ünnerscheedlich Motive, dat reckt vun hollannsch Landschoppen un Stroomansichten, över engelsch Küstenszenerien bit to Ansichten vun de schottsch Lowlands un Highlands, de he ok in de Johren, in de he in Cornwall leev, faken besöcht hett. To Farquharsons Hööftwark hörrn "The Links of Forth" (1883), "In a Fog" (1897), "Full Moon and Spring Tide" (1904) as ok "Birnam Wood" (1906).