Barg (Stood)

Barg liggt op de Geest an’n Rand von de Maschen langs de Swing, de in’n Westen bi Groot Thun langsflütt. In’n Süden liggt de Barger Heid.

De Naveröörd sünd Stood in’n Noorden, Riensföör in’n Oosten, Hagen in’n Süden un Groot Thun in’n Westen.

In de Oorkunnen kummt de Naam toeerst 1337 vör.

Bet in dat 18. Johrhunnert harr Barg man een Buurhoff, twee Katen un een Möhl. Later is de Inwahnertall denn wussen. Bi Barg hebbt se denn von 1934 af an den Flegerhorst Stood boot. Dat weer denn ok de Grund, dat Barg an’n 15. August 1935 Deel von de Gemeen Stood worrn is.

Vondaag is de Stadt Stood bet direkt an Barg ranwussen, hett den Oort aver noch nich sluukt.

Barg is evangeelsch-luthersch präägt un höört bi dat Kaspel von de Johannis-Kark. Bevör de Johannis-Kark 1956 trech worrn is, hett de Oort to dat Kaspel von de Wilhadi-Kark in de Binnenstadt von Stood höört.

De Kameradschop Stood-Barg as Krieger- un Schützenvereen in een is 1885 grünnt worrn.

Barg liggt an’n Barger Weg, de in’n Noordwesten na Stood rinlöppt un an de Bundsstraat 73 ran. In’n Oosten löppt de Barger Weg na Riensföör an de Landsstraat 124. Ans gifft dat noch en lüttjere Straat na Süden, över den een ünner annern na Groot Thun kamen kann.

De nächste Bahnhoff is de in Stood an de Nedderelvbahn, de so bi 3,5 Kilometer weg is.

1. ↑ C. H. Jansen: Statistisches Handbuch des Königreichs Hannover. 1824, Sied 38: http://books.google.de/books?id=tG0AAAAAcAAJ&pg=PA38
2. ↑ Friedrich W. Harseim, C. Schlüter: Statistisches Handbuch für das Königreich Hannover. 1848, Sied 139: http://books.google.de/books?id=eOI-AAAAcAAJ&pg=PA139
3. ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 141: https://books.google.de/books?id=qTZDAQAAMAAJ&pg=RA2-PA141
4. ↑ http://www.gemeindeverzeichnis.de/gem1900/gem1900.htm?hannover/stade.htm
5. ↑ http://www.verwaltungsgeschichte.de/stade.html