Andreas Bovenschulte

Bovenschulte studeer vun 1987 bit 1994 Juristeree an de Universität Bremen. Dat Studium hett he mit sien Eerst Staatsexamen afslaten. Vun 1995 bit 1998 weer he wetenschopplichen Mitarbeiter an de Universität Bremen un hett dor 1998 sien Dokter maakt. As Referendar weer he vun 1998 bit 1999 an dat Hanseaatsche Oberlandesgericht Bremen togange. Dor hett he 1999 sien Tweet Staatsexamen afleggt. Vun Mai 2007 bit 2014 weer he Eersten Gemeenderaat (Den Börgermeester sien Viez) in de Gemeende Weyhe an de Bremer Grenzen. Vun 2014 bit 2019 is he dor Börgermeester ween. Verheiraat is he mit de vörmolige Bremer Staatsraatsche Ulrike Hiller (SPD). Mit ehr hett he twee Kinner.

Bovenschulte höört vun 1984 af an to de SPD to. Bi en Umfraag bi de ehre Liddmaten for de Wahl to den Parteivörsitter vun dat Land Bremen hett Bovenschulte de meisten Stimmen kregen un is denn in’n Juni 2010 vun Parteidag to’n Baas wählt wurrn. He folg dor Uwe Beckmeyer mit na. In’n Oktober 2013 hett he verklaart, he woll as Vörsitter Bott geven un bi de Wahl to’n Börgermeester in Weyhe antreden. An’n 25. Mai 2014 hett he sik dor gegen Nils Krämer dörsetten konnt un is denn Börgermeester wurrn. In’n Mai 2019 is he in de Bremer Börgerschop wählt wurrn. Enne Juni folg denn de Wahl to’n Nafolger vun Björn Tschöpe as Baas vun de SPD-Fraktschoon. En paar Weken later hett he düt Amt wedder afgeven. Sien Nafolger is Mustafa Güngör wurrn. Vunwegen datt Börgermeester Carsten Sieling verklaart harr, he woll nich langer Börgermeester blieven, is Bovenschulte an’n 15. August 2019 to’n neen Börgermeester wählt wurrn.