Afrikaanse Unie

De Afrikaanse Unie (AU) is een politiek samenwarkingsverbaand van 55 lidstaoten in Afrika (staand in 2021). 't Idee veur de AU wördden bekend emeuken mit de Sirte-verklaoring, die op 9 september 1999 etiekend wördden in de Libische stad Sirte. Op 9 juli 2002 vund in Durban, Zuud-Afrika, de oprichtingsbijienkomst plaatse. Dizzend wördden veurezeten deur de Zuud-Afrikaanse president Thabo Mbeki, de eerste veurzitter van de AU. Op de bijienkomst wördden een veurgaond verbaand, de Organisaotie van Afrikaanse Ienheid, opeheven.

De belangriekste beslissings van de AU wördt eneumen deur de halfjaorlijkse Vergadering van de Afrikaanse Unie, waorop de staotsheufden en regerings van de lidstaoten bij menare koomt. 't Secretariaot van de AU, de Commissie van de Afrikaanse Unie, zit in de Ethiopische heufdstad Addis Abeba. Ok hef de AU ofdielings zoas de Raod veur Vrede en Veiligheid en 't Pan-Afrikaans Parlement. De belangriekste warktalen bint Arabisch, Engels, Fraans, Portugees, Spaans en Swahili.

De AU stiet veur een hiele bulte uutdagings, waoronder gezondheidsvraogstokken zoas 't tegengaon van malaria en de Aidsepidemie, politieke vraogstokken zoas 't anpakken van ondemocratische regerings en bemiddeling in börgeroorlogen, economische vraogstokken zoas 't verbetern van de lèefumstaandigheden van miljoenen arme, onopeleide Afrikanen, en ecologische vraogstokken zoas 't anpakken van hongersneud, woestijnvörming en gebrek an ecologische duurzemheid.

Op 1 jannewaori 2021 gunk de Vrije Handelszone van 't Afrikaanse Continent lös, waor 54 van de 55 lidstaoten an mit doet. Dizze handelszone wil ansturen op iene vrije mark veur 't continent. Wieder hef de AU 't in 't zin um hen een douane-unie, een centraole baanke en een mandielige munt te gaon.

In 't Afrikaans het 't verbaand de "Afrika-unie", zodej 't niet in de wiere haalt mit 't volk de Afrikaners.

Dit artikel is eschreven in 't Zuudwest-Drèents.